Crown Agents (CA) konfirmoi dje se kontrata 2-vjeçare e kompanisë me qeverinë tonë për të asistuar Administratën Doganore përfundoi më 9 shkurt 2016.
Në një njoftim për shtyp CA raportoi se të gjithë objektivat operativë jo vetëm që u përmbushën por edhe u tejkaluan ndjeshëm “veçanërisht numri i rasteve të zbuluara të mashtrimit dhe shpërdorimit, i cili ishte mbi 4,500”.
“Si rezultat i rasteve të zbuluara prej nesh gjatë kësaj periudhe, është bërë i mundur identifikimi dhe mbledhja e një shume më të madhe të ardhurash se sa vlera e vetë kontratës. Duke marrë parasysh këtë, nuk ka pasur kosto efektive për taksapaguesit e rregullt shqiptarë. Të vetmit që kanë paguar janë ata individë të cilët po përpiqeshin të shmangnin detyrimet e tyre”, thuhet në njoftimin për mediat.
Njëkohësisht, ka lëvruar shumë seanca trajnimesh për mbi 500 punonjës të Doganave, si edhe janë përgatitur nga kjo kompani një sërë procedurash veprimi dhe dokumentesh informuese për publikun.
“Administrata Doganore ende ka dhe do të ketë sfida me të cilat duhet të përballet, për shkak të vetë llojit të punës që bëjnë. Por, ne shpresojmë që përpjekjet, eksperienca dhe njohuritë tona do t’i ndihmojnë, si tani ashtu edhe në të ardhmen, që të përmbushin standardet e një shërbimi doganor modern”, thuhet në njoftim.
