Një moment dramatik për të gjithë futbollin europian, një moment vërtet i zi edhe për Cristiano Ronaldo. Sulmuesi i Juventusit është izoluar në Madeira-n e tij, ku dje u regjistrua edhe një tërmet me madhësi 3.5 ballë. Kaq shumë frikë për kampionin portugez dhe për të gjithë banorët e Funchal. Toka u trondit rreth orës 10 të mëngjesit (me kohën lokale). Tërmeti e kishte epiqendrën 49 km larg qytetit, por për fat të mirë nuk u regjistruan dëme të veçanta në strukturat e ndërtesave.
Një frikë që shton tensionin, të cilin po e kalojnë të gjithë lojtarët këto ditë, për shkak të urgjencës së “Coronavirus”. Ronaldo është i izoluar në shtëpinë që ka atje në vendlindje, në ishull, që nga para lajmeve për daljen pozitivit të shokut të skuadrës, Rugani. Pesë herë fituesi i “Topit të Artë” kishte fluturuar në Funchal për t’i qëndruar pranë nënës së tij, e goditur nga një iktus cerebral më 3 mars. Ajo është në përmirësim të dukshëm tashmë.
Përmes rrjeteve sociale, CR7 kishte nisur një mesazh, disa ditë më parë, mbi çështjen e “Coronavirus”: “Bota po kalon një kohë vërtet të vështirë, e cila kërkon maturi dhe vëmendje maksimale nga të gjithë ne. Sot ju flas jo si futbollist, por si bir, si baba, si qenie njerëzore e përfshirë në zhvillimet e fundit, që po prekin gjithë botën. Është e rëndësishme të ndiqni udhëzimet e Organizatës Botërore të Shëndetit dhe institucioneve qeveritare për të kuptuar se si të bëni më të mirën në situatën aktuale.
Mbrojtja e jetës njerëzore duhet të mbizotërojë mbi çdo interes. Do të dëshiroja t’u dërgoja një ngushëllim të gjithë atyre që kanë humbur një të dashur, shpreh gjithë solidaritetin tim me ata që luftojnë kundër këtij virusi, siç është shoku im i ekipit, Daniele Rugani. Mbështetje për mjekët, që po rrezikojnë jetën e tyre për të shpëtuar të tjerët”./telesport
g.kosovari
