Nga Lorenc Vangjeli/ Lajm i fundit dhe i konfirmuar.
Nëse mendoni se në Shqipëri njerzit ushqehen vetëm me politikë, kjo është e gabuar. Nëse kjo do të ishte ëndrra e politikanëve, në fakt ky do të ishte makthi i tyre nëse kuptojnë sesa indiferentë janë qytetarët ndaj politikës që i ushqen. Dhe nëse dikush gjykon se Shqipëria fillon dhe mbaron tek spotet elektorale apo tek vetë fushata, mendon shtrembër edhe nëse rri drejt. Dhe ky është në fakt një lajm i i keq po aq saç mund të jetë dhe një lajm i mirë. Prova? Shihni në site të ndryshme on line (dy fjalë të huaja në një gjysëm fjalie…) dhe do të gjendet prova e lajmit të mirë/keq. Shihni cilët janë lajmet më të lexuar gjatë një dite, një e martë tersi për politikën:
Më shumë se premtimi i Kryeministrit Rama në Cërrik se uji i pijshëm apo vaditja do të jetë prioritet, shqiptarët sot, të martën terse, pra, ishin të interesuar të dinin mënyrën e drejtë të gatimit të makaronave. Zbulimi se deri më tani makaronat janë gatuar gabim i ka tronditur lexuesit.
Por ka dhe më keq se kaq. Madje shumë më keq. Më shumë se për estradën qeveritare që denoncon nga Gjirokastra kryetari i opozitës zoti Basha, shqiptarët janë të interesuar për faullin e rëndë moral që bëri Cristiano Ronaldo duke lëshuar lëngjet e tij në rrugë. Lexuan me habi, indinjatë, njëlloj sikur CR7 të ishte çliruar tek oborri i SHQUP-it, faktin se ai nuk kishte duruar dot kur kishte dalë nga një lokal mbrëmjeje në Saint Tropez. Pa e vrarë mendjen se ku SHQUP-i në Tiranë, ku plazhet andej matanë.
“Do ta bëjmë Bashkinë e re të Vorës modelin më të mirë të shërbimit dhe të punësimit në nivel kombëtar. Do të kemi një prioritet të veçantë në bashki dhe një fond për nxitjen e punësimit dhe për formimin profesional”, premton Meta në Vorë i bindur se kandidati i majtë Luan Sallaku do të jetë fitues në garë. Por në Shqipëri duket se janë më të interesuar të dinë se çfarë duhet bërë para gjumit. Nga respektimi i orarit të pizhameve e deri tek fikja e celularit.
Javanews.al është gjithashtu një provë për këtë lajm. Kur në rrjete nisi të udhëtojë fotografia e kandidates së Durrësit Grida Duma, së paku fotoja që pretendohej se ishte e shpinës së saj, gjashtë-shtatë lajmet më të lexuara të site-s ishin ato që kishin të bënin me zonjën në fjalë. Dukej sikur shqiptarët kishin nisur sportin popullor të të folurit pas krahëve.
Eshtë lodhje e qytetarëve? Eshtë indiferencë? Eshtë shenjë se diçka duhet të ndryshojë? Meqë populli nuk ndryshon dot, duhet ndryshuar ndoshta mënyra sesi bëhen lajmet.
Ja ku i keni shembujt nga tre site, JavaNews.al, Top Channel dhe Balkanweb.com. Gjithkush mund të gjykojë vetë edhe pse gjithmonë ka qenë vetë i gjykuar dhe nën gjykim.
LAJMET ME TE LEXUARA NE JAVANEWS.AL
LAJMET ME TE LEXUARA NE TOP CHANNEL
LAJMET ME TE LEXUARA NE BALKANWEB
