Të hënën Italia, shteti më i prekur nga koronavirusi në Evropë, resgjistroi 3,233 raste të reja me koronavirus. Kështu, numri total i të prekurve nga Covid-19 në vend shkon në 27,980 duke e bërë Italinë vendin e dytë në botë më të prekur nga pandemia.
Në vend të parë qëndron Kina me 80,880 raste të konfirmuara.
Nga shifrat e njoftuara mbrëmjen e së hënës nga komisioneri për emergjencat, Angelo Borrelli në një konferencë për shtyp tregojnë se vetëm brenda 24 orëve në Itali kanë ndërruar jetë, jo pak, por 349 persona.
Por, edhe pse numrat vazhdojnë të mbeten të lartë, e vetmja gjë pozitive që u vu re sot është se të dielën numri i viktimave ishte më i madh. Të dielën humbën jetën si pasojë e Covid-19, 368 persona. Pra, 19 persona më shumë se ditën e sotme.
Gjithashtu, duket se kemi një ulje edhe në numrin e personave të infektuar brenda një dite. Numri i personave të infektuar vetëm të dielën ishte 3,590 ndërsa gjatë ditës së sotme u regjistruan 3,233 raste të reja me koronavirus. Pra, të hënën u sëmurën 357 persona më pak se të dielën.
Ndoshta kjo mund të jetë një shenjë që kurba e epidemisë në Itali e ka arritur pikun dhe po vjen drejt uljes. Gjithsesi kjo mbetet për t’u parë në ditët në vazhdim nëse trendi do të vazhdojë të jetë zbritës.
