Të gjithë punonjësit shëndetësorë në Itali duhet ta bëjnë vaksinën për koronavirusin. Lajmin e bëri të ditur qeveria e vendit, ndërsa ky hap i radhës merret për të mbrojtur pacientët. Italia është përfshirë nga një lëvizje kundër vaksinimit ndërsa së fundmi janë zbuluar vatra nëpër spitale pasi stafi refuzoi të vaksinohej.
Sidoqoftë, kritikët e qeverisë kanë vënë në dyshim ligjshmërinë e detyrimit të vetëm disa kategorive të personeleve shëndetësore për ta bërë vaksinën.
Dekreti i së mërkurës i miratuar nga kabineti i kryeministrit Mario Draghi thotë se punonjësve të shëndetësisë, përfshirë farmacistët, “u kërkohet të bëjnë vaksinimin”. Ata që nuk pranojnë mund të pezullohen pa pagesë për pjesën tjetër të vitit.
“Qëllimi i masës është të mbrojë sa më shumë që të jetë e mundur si personelin mjekësor dhe paramjekësor, ashtu edhe ata që janë në ambiente që mund të jenë më të ekspozuar ndaj rrezikut të infektimit,” njoftoi qeveria në një deklaratë.
Dekreti gjithashtu fut mbrojtjen ligjore për ata që administrojnë dozat, një masë që mjekët dhe infermierët kishin kërkuar pasi mjekët u vunë nën hetim për vrasje pas vdekjes së një njeriu të vaksinuar në Siçili .
Italia, fushata e vaksinave e së cilës është penguar nga vonesat e furnizimit që kanë goditur edhe vendet e tjera të Bashkimit Evropian , ka premtuar të arrijë 500,000 vaksinime ditore në prill nga rreth 230,000 aktualisht./ b.h
