Courtois nuk dëshiron të rinovojë kontratën me Chelsean, duke i dhënë sinjale Realit.
Thibaut Courtois, që është pjesë e Chelseat që nga viti 2014, mund të largohet verën e ardhshme nga “Stamford Bridge”, raporton “Mundo Deportivo”, transmeton Gazeta Express.
Pas dështimit të transferimit vite më parë të David de Geas, portieri i Chelseat beson se është shansi jetësor që ai të jetë numri një i Los Blancos, pikërisht tani kur Real Madridi po kërkon me ngulm një gardian për portën, teksa flitet për një transferim të mundshëm të Kepas së Athletic Bilbaos.
Courtois ka kontratë me “Blutë e Londrës” deri në vitin 2019 dhe duket se lojtari tashmë ka vendosur, ai dëshiron një eksperiencë të re. Edhe Hazard kërkohet nga Real Madridi, ai gjithashtu nuk e ka rinovuar ende kontratën me Chelsean.
Trajneri italian, Antonio Conte, ditë më parë tha se shpreson që belgët ta bëjnë sa më parë një gjë të tillë. “Pres që në fund Thibaut dhe Eden të nënshkruajnë kontratat e reja. Sido që të jetë, kjo do të varet nga klubi, është në përgjegjësinë e tyre”. (b.an)
