Sulmet e kontrolluara gjatë ditës së djeshme të terroristëve të ISIS në Tunizi, Kuvajt dhe Francë, duket se nuk do të jenë të fundit në Evropë, teksa shënjestër e tyre është edhe Shqipëria. Sipas një artikulli të së përditshmes italiane “Corriere della Sera” Shërbimet Inteligjente Perëndimore ishin në dijeni për sulmet e përgjakshme terroriste të një dite më parë.
Po sipas gazetës italiane, paralajmërimii për këto sulme ishte bërë nga Abu Mohammed al-Adnani, zëdhënësi i Shtetit Islamik. Përmes një video – mesazhi, ai thoshte:“Veprimi më i mirë për t’iu afruar Zotit është Xhihadi. Ndaj nxitoni për t’a bërë këtë, gjatë këtij muaji dhe përgatituni për martirizim”.
Sipas “Corriere della Sera”, që prej sulmeve ndaj redaksisë së “Charlie Hebdo” në Janar në Paris, edhe Italia është e rrezikuar seriozisht. Pas akteve të një dite më parë, Ministria e Jashtme italiane ka ripërpunuar hartën e vendeve, ku shtetasit italianë janë të rrezikuar nga terrorizmi.
Sipas kësaj harte, ata janë të rrezikuar në Shqipëri. Vendi ynë renditet në të njëjtën kategori me vendet e tjera të rajonit si Bosnja, Mali i Zi, Serbia e Maqedonia, ku italianët këshillohet të kenë kujdes gjatë udhëtimit.
Rreziku më i lartë janë vendet e Afrikës Veriore si Maroku, Algjeria, Libia, Sudani, Nigeria, por edhe Somalia. Përjashtim nuk bëjnë as zonat e famshme turistike të Egjiptit, si “Sharm el Sheik”, për të cilën qeveria italiane këshillon të shmangen udhëtimet.
