Autoritetet italiane dhe spanjolle kanë çmontuar një rrjet të madh kriminal të akuzuar për trafik kanabisi në Evropë. Lajmi u njoftua nga Europol të enjten.
Operacioni çoi në arrestimin e 78 personave të akuzuar si të lidhur me më shumë se gjashtë tonë dërgesa të kanabisit dhe hashashit të përgjuara në BE gjatë viteve të fundit. Në mes të arrestuarve janë edhe 36 shqiptarë.
Europol tha se 58 nga të arrestuarit u kapën në Itali, ndërsa 20 të tjerët në Spanjë. Operacioni specifik përfshiu gjithashtu 25 kontrolle në shtëpi si dhe sekuestrimin e 350 kilogramëve hashash, 33 kg marijuanë, armë, pajisje elektronike, dokumente dhe asete me vlerë 845,000 euro.
“Rrjeti kriminal ishte goditur tashmë në nëntor 2022, kur Europol mbështeti një aksion të koordinuar që çoi në arrestimin e 36 të dyshuarve të shtetasve shqiptarë, italianë dhe spanjollë në Itali”, tha agjencia ligjzbatuese e BE-së.
Të dyshuarit përdorën platforma të koduara komunikimi Sky ECC dhe Encrochat për të koordinuar logjistikën pas operacioneve të trafikimit.
Europol shtoi se shtetasit marokenë me bazë në Spanjë organizuan dërgesat e drogës në Spanjë dhe dërgimin e tyre të mëpasshëm në shpërndarës të ndryshëm në Itali.
“Aktorë të ndryshëm lehtësuan furnizimin e përgjithshëm dhe procesin logjistik të rrjetit: nga grumbullimi, ruajtja, transportimi dhe shpërndarja e kanabisit deri te pagesat dhe aktivitetet e pastrimit të parave”, thuhet në deklaratë.
Pagesat për dërgesat e drogës u organizuan nëpërmjet një sistemi bankar informal të ngjashëm me haëala i njohur si fei-ch’ien, një sistem bankar nëntokësor i drejtuar kryesisht nga shtetas kinezë, i cili lejon transferimin e parave të gatshme nga një vend në tjetrin përmes një rrjeti të besuar zyrat.
/a.r
