Pas aludimeve në media për rritje të çmimit të gazit të lëngshëm për konsumatorët familjarë (ndërkohë që është rritur çmimi vetëm për automjetet), ka reaguar edhe Autoriteti I Konkurencës.
Në deklaratën e shpërndarë për mediat, ky autoritet thekson se “ka nxjerrë në terren me urgjencë specialistët për monitorimin e tregut sipas nenit 28 të Ligjit 9121 datë 28.07.2003 “Për mbrojtjen e Konkurrencës”, i ndryshuar.”
Ja deklarata e plotë e Autoritetit të Konkurencës:
“Mbi monitorimin e Tregut të Gazit të Lëngshëm për konsum familjar dhe biznesin
Autoriteti i Konkurrencës, pas shqetësimit të ngritur nga mediat elektronike dhe të
shkruara në lidhje me rritjen e çmimit të gazit të lëngshëm në treg, i cili në ndryshimet e fundit ligjore për paketën fiskale, ka prekur vetëm përdorimin e gazit të lëngshëm për
automjetet, dhe jo përdorimin e tij për nevoja të konsumatorit (rritja e akcizës për këtë
kategori është 0 lekë), ka nxjerrë në terren me urgjencë specialistët për monitorimin e
tregut sipas nenit 28 të Ligjit 9121 datë 28.07.2003 “Për mbrojtjen e Konkurrencës”, i
ndryshuar.
Autoriteti i Konkurrencës do të vlerësojë kushtet e tregut për të parë nëse ka shenja të
ndonjë marrëveshje të ndaluar (kartel) apo abuzim me pozitën dominuese, e cila mund
të sjellë pengimin, kufizimin apo shtrembërimin e konkurrencës nëpërmjet vendosjes në
mënyrë të drejtpërdrejtë apo të tërthortë të çmimit të blerjes apo të shitjes, ose të
ndonjë kushti tjetër tregtimi, i cili ndikon në mënyrë të drejtpërdrejte tek konsumatori.
Tregu përkatës nën monitorim do të jetë tregu i importit dhe tregtimit me shumicë dhe
pakicë të gazit të lëngshëm për konsum familjar, dhe për bizneset të cilat e përdorin si
lëndë djegëse në ofrimin e prodhimit dhe shërbimeve të tyre kundrejt konsumatorit.
Pas monitorimit dhe vlerësimit të situatës nëse ka shenja të kufizimit të konkurrencës
Autoriteti do të procedojë menjëherë me marrjen e masave konkrete, ndaj subjekteve të
tregtimit me shumicë ose pakicë për kthimin e tregut në kushtet e konkurrencës.”, shkruhet në njoftimin për mediat të shpërndarë nga Autoriteti i Konkurencës.
java / d.b
