Nga Tirana në Durrës, përfshirë rivierën e jugut apo vijën bregdetare të Shëngjinit e Talës… harta e re e referencave do shtrenjtojë edhe më tej çmimet e apartamenteve. Me 10 deri në 20 për qind pritet të rriten çmimet në Tiranë e brigjet e plazheve të veriut, ndërsa me 40 deri në 60 për qind do të shtrenjtohen apartamentet në Himarë, Palasë, Vlorë e Durrës.
“Pritet një rritje e çmimeve pasi gjithmonë ka një justifikim për shtrenjtimin e çmimeve, por jo për uljen e tyre”, tha për A2 CNN, Erjon Alimema, agjent i pasurive të patundshme.
Me përditësimin e hartës së referencave të ndryshuar së fundmi verën e vitit 2023, vetëm një zonë në kryeqytet pritet të ofrojë çmime të përballueshme për shtresën mesatare të popullsisë.
“Zona e Paskuqanit pritet të ofrojë çmime deri në 1 mijë euro për m2. Kjo me gjithë hapjen e Unazës së Madhe, infrastruktura vijon të mbetet e dobët ndaj pritet që çmimet do të mbesin në këto nivele”, shtoi Alimema.
Me referencat e reja një metër katror në zonën më të frekuentuar të bregdetit të Durrësit që është ‘Zona 13’ e njohur si lagjja e plazhit, një metër katror pritet të kushtojë 2 mijë euro me rritje 323 për qind në raport me referencën aktuale prej 472 euro/metri.
Ngjashëm pritet të shtrenjtohen apartamentet edhe në Gjirin e Lalzit. “Janë dy zona me zhvillim shumë të lartë, veçanërisht të rezidencave. Çmimet rrjedhimisht do të rriten”, qartësoi Alimema.
Referencat e reja që pritet të publikohen pas zgjedhjeve të 11 majit pritet të prekin jo vetëm bashkitë e shtrira përgjatë bregdetit por edhe qytete të tjera që kanë marrë hov zhvillimi vitet e fundit.
Mungesa e referencave të pronave për të gjitha bashkitë e vendit u bë shkak edhe për shtyrjen e rivlerësimit të pasurive të paluajtshme të paralajmëruar për të ndodhur gjatë vitit të shkuar./a2
