Ditët e fundit disa vende deklaruan se nuk do të dërgojnë zyrtarë qeveritarë për të marrë pjesë në ceremoninë e hapjes së Lojërave Olimpike Dimërore të Pekinit. “Një qëndrim i tillë është vetëm spekulim politik, sepse pala kineze nuk u ka dërguar ftesë për pjesëmarrje. Mungesa e tyre nuk do të pakësojë aspak magjinë e Lojërave Olimpike,” komenton Grupi Mediatik i Kinës. Ndërkohë, kryetari i Komitetit Olimpik Ndërkombëtar Thomas Bach paralajmëroi se politizimi i Lojërave Olimpike do të cenojë seriozisht të ardhmen e këtij mitingu të madh sportiv.
Stadium për Lojërat Olimpike Dimërore, Pekin(VCG)
“Në Kartën Olimpike është shprehur qartazi parimi i asnjanësisë politike të sportit. Në moton e rishikuar olimpike është shtuar ‘së bashku’. Mirëpo disa vende po e politizojnë sportin në kundërshtim me frymën e Lojërave Olimpike. Sipas rregullave olimpike, lideri i një vendi, nëse do të jetë i pranishëm në Lojërat Olimpike, duhet të marrë ftesën nga komiteti olimpik i vendit dhe të regjistrohet në Komitetin Olimpik Ndërkombëtar. Por disa vende, pa marrë ftesë, deklaruan vetë se nuk do të dërgojnë zyrtarë në Lojërat Olimpike Dimërore, çka është thjesht një shfaqje politike për të kënaqur forcat e brendshme antikineze nëpërmjet përbaltjes së Kinës,” thuhet në koment.
Në samitin e 10-të olimpik të hapur më 11 dhjetor, Komiteti Olimpik Ndërkombëtar publikoi një deklaratë, ku shprehet kundërshtimi ndaj politizimit të lojërave olimpike dhe të sportit. Në deklaratë përshëndetet njëkohësisht miratimi nga 173 vende i rezolutës së armëpushimit gjatë organizimit të Lojërave Olimpike Dimërore të Pekinit.
Deri tani, sekretari i përgjithshëm i OKB-së Antonio Guterres dhe presidenti rus Vladmir Putin kanë konfirmuar pjesëmarrjen e tyre në ceremoninë e hapjes së Lojërave Olimpike Dimërore të Pekinit. Siç mësohet nga Ministria e Punëve të Jashtme e Kinës, disa krerë shtetesh e qeverish dhe anëtarë të familjeve mbretërore kanë bërë regjistrimin për pjesëmarrjen e tyre. Vendet si Koreja e Jugut, Afrika e Jugut etj., kanë shprehur përkrahje ndaj Lojërave Olimpike Dimërore të Pekinit.
Sportistë zhvillojnë garë testimi në objekte garimi(VCG)
Në të njëjtën kohë, sportistët e vendeve të ndryshme kanë shfaqur entuziazmin e tyre për të marrë pjesë në Lojërat Olimpike Dimërore të Pekinit. Të dhënat e publikuara nga Komiteti Organizator i Lojërave Olimpike të Pekinit tregojnë se deri më 17 nëntor, komitetet olimpike të vendeve europiane, si dhe të ShBA-së, Kanadasë, Australisë e Zelandës së Re, kanë paraqitur mbi 14 mijë aplikime për regjistrimin e sportistëve. Vetëm Komiteti Olimpik i ShBA-së ka paraqitur 1528 aplikime. Ndërsa Rusia bëri të ditur se do të dërgojë një delegacion të madh prej gati 450 anëtarësh në Lojërat Olimpike Dimërore të Pekinit, duke përfshirë 216 sportistë.
Tani po zhvillohen gara testimi në vendet e organizimit të Lojërave Olimpike Dimërore të Pekinit. Nga tetori deri tani, mbi 2000 sportistë, trajnerë, zyrtarë nga vende të ndryshme kanë marrë pjesë në 10 veprimtari të sporteve dimërore të organizuara në Kinë. Shumë sportistë pjesëmarrës kanë vlerësuar objektet e garimit në Lojërat Olimpike Dimërore të Pekinit.
“Tani, para situatës ende serioze të pandemisë, organizimi i Lojërave Olimpike Dimërore të Pekinit ofron jo vetëm një takim madhështor sportiv, por edhe përmbledh shpresat e njerëzve për bashkim, paqe dhe miqësi. Disa vende nuk mund të përfaqësojnë gjithë familjen olimpike. Pas disa ditësh Kina do t’i japë botës një olimpiadë dimërore të sigurt, të mrekullueshme dhe ekonomike”, përfundon komenti i CMG-së.
/b.h
