Samuel Eto’o u tërhoq nga futbolli në shtator të vitit 2019, pas një karriere mbresëlënëse, që zgjati më shumë se dy dekada (1997-2019), por kamerunasi, që në muajin mars mbush 40 vjeç, mund të luajë sërish si futbollist profesionist, ndonëse bëhet fjalë për një kohë të shkurtër. Ideja e çmendur vjen nga Spanja, më konkretisht nga Murcia, ekip që aktualisht luan në kategorinë e tretë të futbollit të vendit iberik.
Është vetë presidenti i Murcias, Morris Pagniello, i cili konfirmon mundësinë e kthimit të Eto’osë në fushat e blerta, pasi thashethemet nisën të qarkullonin në orët e para të ditës së kësaj të marte. Investitorët nga Meksika dhe Emiratet e Bashkuara Arabe mund të ndihmojnë në afrimin te kjo skuadër të ish-kampionit të Interit dhe Barcelonës. I intervistuar nga Marca, Pagniello zbuloi:
“Blerja e Eto’osë është aktualisht 50% e mundur. Javën tjetër do të mësojmë më shumë nëse do të jetë e mundur afrimi i tij, por ne kemi gjithashtu një plan B.”
Nëse Eto’o do të bindet për t’u kthyer pas pak më shumë se një vitit në fushat e blerta, atëherë do të mund ta shohim në aksion në raundin e parë të Kupës së Spanjës, kundër Levantes.
“Nëse e blejmë, do të jetë në dorën e trajnerit që ta aktivizojë. E dimë që kjo ndeshje është shumë e rëndësishme.”
Eto’o, një nga futbollistët më të paguar në historinë e futbollit, u pensionua në Doha, në vitin 2019, pasi kishte veshur fanellën e Katar SC.
A do të nisë Eto’o një kapitulli të ri në Spanjë, 23 vite pasi zbarkoi për herë të parë në Gadishullin Iberik? Është një ide e çmendur, që mund të bëhet realitet.
