Dy nëna në Tiranë kanë rënë pre të dhunës në familje, nga djemtë e tyre, njëri 23 e tjetri 16 vjeç. Ngjarja e parë ka ndodhur në rrugën “Don Bosko”, ku Policia ka kryer edhe arrestimin e djalit të 62- vjeçares së dhunuar, i cili përveç dhunës në familje, akuzohet edhe për vjedhje.
Policia tha se shërbimet e Komisariatit Nr.3 kryen arrestimin e 23-vjeçarit me iniciale I.L., i dënuar edhe më parë. Ky shtetas, pasi nuk ka bindur të ëmën, shtetasen me iniciale R.M., që t’i jepte para, ka ushtruar dhunë psikologjike ndaj saj. Më pas ka vjedhur disa orendi shtëpiake, në kohën që e ëma nuk ndodhej në shtëpi.
Policia tha se ka plotësuar kërkesëpadinë për lëshimin e urdhrit të menjëhershëm të mbrojtjes për 62-vjeçaren, ndërsa ka kryer arrestimin e djalit të saj.
“Më datë 04.08.2018 u arrestua shtetasi I.L., 23 vjeç, banues në Tiranë, i dënuar më parë, pasi në rrugën ‘Don Bosko’, në banesë, i ka vjedhur disa orendi shtëpiake, si dhe ka ushtruar dhunë psikologjike ndaj nënës, R.M., 62 vjeçe, së cilës iu plotësua kërkesëpadia për lëshimin e urdhrit të mbrojtjes së menjëhershme. Materialet u referuan në Gjykatën e Shkallës së Parë Tiranë. Ligji Nr. 9669, datë 18.12.2006, ‘Për masa ndaj dhunës në marrëdhëniet familjare’”, tha dje Policia.
Rasti tjetër i dhunës në familje ka ndodhur në zonën e Kamzës. Një 43-vjeçare, shtetasja me iniciale F.T., është paraqitur në Komisariatin Nr.5, ku ka kërkuar mbrojtje, pasi i biri adoleshent ka ushtruar dhunë fizike dhe psikologjike ndaj saj. Policia tha se shtetases në fjalë iu plotësia menjëherë kërkesëpadia, ndërsa nisi procedim penal për djalin e saj, 16-vjeçarin me iniciale A.T.
ma.me
