Brenda pak ditësh shënohen disa raste që nxjerrin në pah një problem të rëndë: varësinë nga droga. Një person i preu kokën një të afërmi minoren dhe një kosovar terrorizoi Vlorën. Për të parin thuhet se është i çmendur, për të dytin mediat e huaja thonë se ai mund të jetë terrorist. Por në fakt të dy kanë një problem: Janë të droguar. Dhe në kohën kur Shqipëria thuhet se është mbushur me drogë, ky duket problemi më i madh.
Gjykata e Krimeve të Rënda ka dhënë mëngjesin e ditës së sotme masën e sigurisë për shtetasin kosovar Dijar Xhema, i cili 3 ditë më parë tentoi të rrëmbente në qytetin e Vlorës 3 persona. Për 29-vjeçarin nga Kosova është dhënë masa shtrim i detyrueshëm në spital.
Sipas policisë, ky shtetas ka dhunuar fizikisht, psikologjikisht dhe ka tentuar të rrëmbejë me mjetin e tij “Audi” me targa KS02300CO, tre shtetas me inicialet: B.N, N.I, dhe F. D. në vende të ndryshme të qytetit të Vlorës brenda një harku kohor prej 2 orësh. Këto veprime ky shtetas i ka shoqëruar me thirrjet në vende dhe ambiente publike si “Allahu Akbar”, “Jam i dërguari i Allahut”, dhe “Do ju vras të gjithëve”.
Mediat italiane i kanë kushtuar një shkrim 29-vjeçarit kosovar, Dijar Xhema, i cili u arrestua pak ditë më parë në qytetin e Vlorës. Kjo ngjarje ka zgjuar interes të madh mediatik edhe në shtetin fqinj të Italisë, duke qenë se fjalët e 29-vjeçarit dhe e shkuara e tij e implikojnë në aktivitete terroriste. Sipas “Il Giornale”, dinamika e ngjarjes mbetet akoma e paqartë. Pasi shpjegon sesi kosovari ka krijuar kaos në qytet, e përditshmja italiane shtron disa pyetje.
A do t’i realizonte ai rrëmbimet? Me çfarë qëllimi? Çfarë kërcënimesh të tjera u ka bërë kalimtarëve? A i ka sulmuar në të vërtetë apo lënduar me thikë siç u tha fillimisht? Dhe, a gjendemi përballë një rasti të izoluar të një krimineli që këtë e ka thjeshtë lëvizjen e radhës, apo i dyshuari ka pasur kontakte me qarqet radikale dhe ka ndërmarrë një veprim ekstrem të pa planifikuar siç duhet? Sipas një vëzhgimi të profilit të tij në Facebook nuk vërehen tendenca radikale, por sigurisht që ky nuk është tregues i mjaftueshëm për ta përjashtuar terrorizmin si pistë hetimi. Të gjitha aspektet duhet të sqarohen sepse mund të gjendemi përballë episodit të parë të “ujkut të vetmuar” në Shqipëri, duke na bërë të supozojmë se ky është rasti i parë i “xhihadit me thika” përgjatë Adriatikut, shkruan Il Giornale.
Ndërsa dje Prokuroria për Krime të Rënda në Tiranë kërkoi caktimin e masës së sigurisë “arrest në burg” për shtetasin kosovar, Dijar Xhema, i cili është i dyshuar për veprën penale të “veprimeve me qëllime terroriste”. Nga veprimet e deritanishme hetimore, rezulton se, i dyshuari udhëtonte në rrugët e qytetit të Vlorës me mjetin e tij, tip Audi A5. Në tre momente të ndryshme, ai ndalonte makinën dhe ka tentuar të marrë me forcë dhe t’i marrë në makinën e tij, 3 persona, dy meshkuj dhe një femër. Prokuroria thotë se në çdo rast, ai përsëriste shprehje fetare. Nga të dhënat e deritanishme, rezulton se ai shfrytëzonte forcën e tij fizike për të tërhequr me dhunë persona që nuk kishin asnjë njohje dhe asnjë lidhje me personin e dyshuar.
Sipas prokurorisë vendet e përzgjedhura prej tij për të tentuar rrëmbimin e personave ishin rastësore. Avokati i të riut ka depozituar kartelën mjekësore ku sipas tij 29-vjeçari vuan nga çrregullime mendore. Këto të dhëna pritet të shqyrtohen nga gjykata, e cila mëngjesin e sotëm do të zhvillojë seancën për caktimin e masës së sigurimit ndaj 29-vjeçarit kosovar. I arrestuari ka deklaruar se nuk ka lidhje me ISIS, por ka qenë nën efektin e drogës kur ka tentuar të rrëmbejë 3 personat.
