Zbardhen detaje nga dosja e grupit të drogës që mbushi me kokainë Europën, i përbërë nga 16 anëtarë të cilët janë identifikuar që të gjithë dhe janë nën hetim. Këtij grupi që trafikonte kokainë nga Amerika e Jugut drejt BE, i janë sekuestruar mbi 6 ton kokainë, me vlerë tregu 411 milionë Euro.
Në pranga ranë bosi i Cincos Ermir Ndreaj, dy biznesmenët Artur dhe Klevis Hoxhosmani, si dhe u lëshua masë e dytë sigurie për ish-ortakët e tyre Erion Alibej dhe Plaurent Dervishaj, të dy në qeli edhe për dosjen ‘Plumbi i Artë’.
SPAK e goditur grupin pas zbërthimit të bisedave në SkyECC, por edhe dëshmitë e të penduarit të drejtësisë Alibej. Në momentin e arrestimit, Ermir Ndreaj ishte në Palasë duke shijuar rrezet e diellit në një skaf luksoz.
Në dosjen e siguruar nga Report TV, zbardhen edhe pseudonimit që grupi përdorte me njëri-tjetrin. Të gjithë anëtarët e grupit e thërrisnin Ndreajn si ‘Cinco’, pseudonim referuar klubit të njohur të natës Cinco Cavalli që zotërohej nga ai.
Ndërkohë, biznesmeni tjetër Artur Hoxhosmani, njihej me pseudonimin “burrelsi”, “lambo”, “santucio” dhe “santucio nee”. Vëllai i tij Klevis Hoxhosmani kishte pseudonimet “keli dhe “Santucio brother”. Ilir Lloshi, i cili është ende në kërkim, thirrej ‘Licja’, ndërsa biznesmeni tjetër po në kërkim Elidon Skëndaj njihej si Bisha dhe Bisha New.
