Të premten Bayern Mynchen bëri zyrtar trajnerin e ri që do të marrë drejtimin e skuadrës nga vera e ardhshme. I përzgjedhuri i gjermanëve të cilët aktualisht drejtohen nga Jupp Heynkes është Niko Kovac.
Gjithsesi kroati që është nën drejtimin e Eintracht Frankfurt nuk ishte zgjedhja e parë e klubit dhe këtë e zbulon Uli Hoeness, presidenti i Bayern Mynchen. Si fillim është menduar të bindej Jupp heynkes për të vazhduar edhe për një sezon, por pas refuzimit të 72-vjeçarit është negociuar me Thomas Tuchel.
Edhe ish-trajneri i Borussia Dortmund refuzoi, pasi deklaroi se ka firmosur që më parë për një ekip tjetër (mendohet PSG). Dhe në fund u vendos që ekipin kampion të Bundesligës ta drejtojë 46-vjeçari Kovac, që do të zëvendësojë pikërisht Heynckes në fund të këtij sezoni. “Ne donim që të merrnim një trajner që ishte i lirë dhe synonim të merrnim Tuchel, pasi Heynckes na konfirmoi se nuk do të qëndrojë sezonin e ardhshëm në stolin e Bayern, por edhe ai na refuzoi”, tha Uli Hoeness, presidenti i Bayern Mynih.
“Më pas u ulëm sërish në tavolinë dhe nisëm bisedimet me Niko Kovac, që pranoi ofertën tonë dhe kështu që ramë dakord për trajnerin e ri. Për pak kohë ishim konfuzë për sa i përket të ardhmes. Na vjen keq që ndërpremë bashkëpunimin e tij me Frankfurt, por jam i sigurt se do të kemi një të ardhme të mirë me Niko”, tha Uli Hoeness.(Balkanweb)
