Kylian Mbappe po vazhdon të shkruajë historinë në Kupën e Botës 2026. Sulmuesi dhe kapiteni i Francës ishte përsëri vendimtar në fitoren 2-0 ndaj Marokut në çerekfinale, duke realizuar një gol dhe duke ndihmuar skuadrën të sigurojë kualifikimin në gjysmëfinale.
Edhe pse humbi një penallti në pjesën e parë, Mbappe reagoi në fraksionin e dytë duke shënuar golin që e barazoi me Lionel Messin në krye të listës së futbollistëve me më shumë gola të shënuar nga loja (pa penallti) në historinë e Kupës së Botës. Të dy numërojnë nga 17 gola në eventin më të rëndësishëm futbollistik, ndërsa francezi ka arritur në kuotën e 20 golave në total në Botërore, vetëm një më pak se Messi.
Turneu në Amerikën e Veriut ka qenë i jashtëzakonshëm për 27-vjeçarin, i cili ka thyer ose barazuar disa rekorde historike. Që në ndeshjen hapëse ndaj Senegalit ai u bë golashënuesi më i mirë i të gjitha kohërave për kombëtaren franceze, duke lënë pas Olivier Giroud. Aktualisht Mbappe ka 64 gola me Francën, ndërsa Giroud mbetet me 57. Pas tyre renditen Thierry Henry me 51 dhe Antoine Griezmann me 44 gola.
Po me golin ndaj Senegalit, Mbappe u bë edhe golashënuesi më i mirë i Francës në historinë e Kupës së Botës. Ai kaloi rekordin legjendar të Just Fontaine, i cili kishte realizuar 13 gola në Botërorin e vitit 1958. Që atëherë, Mbappe ka vazhduar ritmin fantastik dhe e ka çuar totalin në 20 gola.
Një tjetër rekord i rëndësishëm është ai i golave në fazën me eliminim direkt. Goli i tij ndaj Suedisë e ngriti në vendin e parë të të gjitha kohërave në këtë kategori, duke lënë pas legjenda si Leonidas dhe Ronaldo. Pas golave të tjerë kundër Suedisë, Paraguait dhe Marokut, ai tashmë ka 12 gola në ndeshjet me eliminim direkt të Kupës së Botës.
Mbappe ka shkëlqyer edhe si asistues. Asisti për Ousmane Dembélé ndaj Marokut e bëri futbollistin e parë në histori që regjistron të paktën 10 kontribute direkte në gola në dy Botërorë të ndryshëm. Pas paraqitjes së jashtëzakonshme në Katar 2022, ku kishte tetë gola dhe dy asistime, ai ka përsëritur dhe përmirësuar këtë arritje edhe në Botërorin 2026.
Një tjetër moment historik është edhe numri i paraqitjeve. Me 20 ndeshje në fazat finale të Kupës së Botës, Mbappe ka barazuar rekordin e Hugo Lloris si lojtari me më shumë paraqitje për Francën në këtë kompeticion. Duke qenë se Franca është kualifikuar në gjysmëfinale, kjo tregon se ai do ta thyejë këtë rekord në ndeshjen e ardhshme.
Në moshën vetëm 27-vjeçare, Kylian Mbappe po ndërton një trashëgimi që e vendos mes futbollistëve më të mëdhenj në historinë e Kupës së Botës. Me rekorde të njëpasnjëshme, gola vendimtarë dhe ndikim të jashtëzakonshëm në lojën e Francës, sulmuesi i Real Madridit vazhdon të jetë figura kryesore e Botërorit 2026 dhe një nga favoritët kryesorë për të udhëhequr “Les Bleus” drejt një tjetër trofeu botëror.
