Seanca plenare e së enjtes në Kuvend u zhvillua mes tensioneve, debateve të ashpra dhe bllokimit të foltores nga opozita. Pavarësisht kaosit dhe rrëmujës, në këtë seancë u miratuan ndryshimet në kabinetin qeveritar dhe disa projektligje të rëndësishme, ndërsa të tjera u rrëzuan.
Katër janë projektligjet që u miratuan:
-Projektligji për trajtimin e barabartë të mësuesve, mori 81 vota pro.
-Projektligji “Për ratifikimin e marrëveshjes së huas ndërmjet Shqipërisë dhe KfW Frankfurt am Main për programin Infrastruktura Bashkiake V – faza II”, mori 81 vota pro.
-Projektligji “Për Agjencinë e Mbikëqyrjes në Sistemin e Ekzekutimit të Vendimeve Penale”, mori 81 vota pro.
-Projektligji për ndryshime në ligjin nr. 46/2018 “Për kontrollin shtetëror të transferimeve ndërkombëtare të mallrave ushtarake dhe të artikujve e teknologjive me përdorim të dyfishtë”, të ndryshuar”, mori 81 vota pro.
Ndërkohë, u rrëzuan dy projektligje:
-Për një ndryshim në ligjin nr. 9975 “Për taksat kombëtare”, i cili mori 79 vota kundër
-Për një ndryshim në ligjin nr. 68/2017 “Për financat e vetëqeverisjes vendore”, i cili mori 78 vota kundër
Ndryshimet në kabinet
Në seancën e djeshme u miratuan mes kaosit edhe ndryshimet në kabinet. Shtatë ministrat e rinj do të betohen sot në Pallatin e Brigadave përpara presidentit të Republikës, Bajram Begaj.
Seanca e djeshme u tensionua edhe për shkak të debateve mes palëve mbi kërkesën e SPAK-ut për arrestimin e Ballukut. Opozita kërkoi shqyrtimin e raportit për heqjen e imunitetit brenda ditës duke akuzuar maxhorancën se nuk e kishte futur në rend dite qëllimisht, por kreu i grupit parlamentar të PS-së Taulant Balla deklaroi se raporti i PS-së do të paraqitet më 12 mars dhe atë ditë do të diskutohet çështja.
