Seksioni për Krimin Ekonomik e Financiar në Drejtorinë e Policisë Tiranë, në kuadër të operacionit policor të koduar “Të kamufluarit”, ka sekuestruar një sasi të konsiderueshme malli kontrabandë dhe ka arrestuar tre shtetas.
Sipas policisë, të arrestuar janë Agron Tice, 57 vjeç, lindur në Përmet, banues në Tiranë; Miranda Tice, 46 vjeç, lindur në Këlcyrë dhe banues në Tiranë, si dhe Ismail Xhengo, 49 vjeç, lindur në Korçë, banues në Tiranë
Arrestimi i tyre u bë pasi specialistët e Seksionit për Krimin Ekonomik në Drejtorinë e Policisë Tiranë kanë marrë informacion në rrugë operative për veprimtarinë e kundraligjshme në fushën e kontrabandës së cigareve të kryer nga shtetasit Agron dhe Miranda Tice.
Ata kamuflonin veprimtarinë e kundraligjshme duke shitur produkte të ndryshme industriale në një dyqan të ndodhur në zonën e Tregut të Shkollës Teknologjike Tiranë. Mbi bazën e këtyre informacioneve nga ana e Policisë është organizuar puna dhe u finalizua me sukses operacioni i koduar “Të kamufluarit”.
Shtetasit e sipërpërmendur janë kapur në flagrancë në një banesë private në pronësi të shtetasit Ismail Xhengo në zonën e Fushës së Aviacionit Tiranë, në të cilën kishin improvizuar një depo ku mbanin cigaret kondrabandë. Nga kontrolli i kësaj depoje janë gjetur dhe sekuestruar në cilësinë e provës materiale 9.950 paketa cigaresh kontrabandë. Gjithashtu në cilësinë e provës materiale u sekuestrua edhe një automjet i markës Mercedes Benz me targë AA061BS.
Materialet i kaluan Prokurorisë së Rrethit Gjyqësor Tiranë për veprat penale të ‘’Tregtimit dhe transportimit të mallrave kontrabandë’’, ‘’Ruajtja dhe depozitimi i mallrave kontrabandë” dhe ‘’Fshehje e të ardhurave’’ të parashikuara nga nenet 178,179 dhe 180 të Kodit Penal, në ngarkim të shtetasve Agron Tice, Miranda Tice dhe Ismail Xhengo.
