Çifti i pandashëm prej 68 vjetësh bashkë edhe në dhomën e spitalit
Tom Clark, 96 vjeç e gruaja e tij 92-vjeçare, Arnisteen, janë të martuar prej 68 vjetësh. Gjatë jetës së tyre, çifti është ndarë vetëm gjatë luftës së Koresë, kur Tom u thirr nën armë.
Për këtë, kur dy të martuarit u shtruan në repartin e kirurgjisë ortopedike të “Piedmont Fayette Hospital” në shtetin e Xhorxhias në SHBA, ndarja e tyre shkaktoi një traumë. Për të dy në të vërtetë ishin përgatitur dhoma të ndara. Por në fund, drejtuesit e spitalit, vendosën të thyejnë rregulloren (dhomat e strukturës janë me shtretër të veçantë) dhe t’i ribashkojnë.
Siç konfirmon edhe faqja në “Facebook” e vetë spitalit, Tom dhe Arnisteen, kanë qenë së bashku në krah të njëri-tjetrit, për të shmangur probleme të lidhura me largësinë. Pas dekadave së bashku, një ndarje e papritur me moshën mbi 90-vjeçare, mund të kishte provokuar probleme të aspektit psikologjik, duke rënduar sëmundjen e kujtesës (ose ndryshe skleroza).
Drejtuesit e spitalit kanë postuar foto të çiftit që buzëqesh, më në fund në të njëjtën dhomë. “Nuk arrij pikërisht të qëndroj larg saj, është gruaja më e bukur në botë”, – ka deklaruar Tom me kënaqësi.
