CIA, Agjencia Qendrore e Inteligjencës në SHBA, e kishte njoftuar Policinë spanjolle dy muaj më parë se shëtitorja e “Las Ramblas” në Barcelonë mund të bëhej skenë e një sulmi terrorist. Oficerët në qytetin spanjoll raportohet se ishin lajmëruar mbi një incident potencial fatal, pas një sërë sulmesh me fugon apo kamionë e makina të përdorura nga terroristët në qytete të ndryshme europiane.
Të enjten, vetëm pak javë pas këtij paralajmërimi, të paktën 13 njerëz kanë humbur jetën dhe mbi 60 janë plagosur, kur një fugon hyri në zonën e këmbësorëve, pikërisht në shëtitoren ikonë të Barcelonës, shumë e populluar nga turistët.
Gazeta spanjolle “El Peridoico” ka raportuar se agjencia amerikane e spiunazhit, specifikisht kishte përmendur “Las Ramblas” me forcat lokale të policisë, “Mossos d’Esquadra”.
Gazeta “El Periodico” ka shkruar: “CIA e kishte paralajmëruar ‘Mossos d’Esquadra’ se Barcelona mund të bëhej një shënjestër terroriste. Agjencia qendrore e inteligjencës e kishte bërë lajmërimin për policinë autonome katalane dy muaj më parë. Madje e kishin vënë edhe fokusin te ‘Las Ramblas’”.
Gjatë muajit maj, CIA kishte paralajmëruar edhe qytete të tjera europiane, se mund të bëheshin shënjestër e sulmeve terroriste. Alarmi erdhi pas sulmeve të kryera tashmë në Londër, Stokholm, Berlin dhe Nicë.
