Aktorja dhe producentja filmike Charlize Theron (43) është e njohur globalisht, por fëmijëria e saj nuk ishte e lumtur dhe pa brenga. Sado të vështirë që e kishte, Charlize nuk i mbajti traumat për vete, por i tregoi publikisht ato, përcjell Elle.
Charles, babai i aktores, ishte alkoolist dhe i dhunshëm. Një natë ai u kthye në shtëpi i dehur, filloi të godiste dhe kërcënonte se do ta qëllonte me pushkë atë dhe nënën e saj Gerda, transmeton Koha.net. Këto nuk ishin thjesht fjalë boshe. Ai filloi të qëllonte në dhomën e Charlize, ndërsa Gerda, e frikësuar për jetën e saj, e mori armën dhe e vrau.
“Atëherë shtiresha sikur kjo nuk ka ndodhur, sepse nuk doja të flisja për këtë. U thashë njerëzve që i ati im vdiq në një aksident trafiku. Kush do të donte ta tregonte një histori të tillë? Askush nuk di se si të reagojë kur u thoni se babai juaj është një alkoolik i cili u vra nga nëna juaj. Nuk doja të më shikonin si viktimë”, – tha Charlize, e cila ishte 15 vjeç kur u vra Charles.
Derisa babai i saj ishte gjallë, Charlize vazhdimisht kishte frikë nga ai. Çdo ditë ajo zgjohej nga frika se çfarë disponimi kishte ai, por thotë se është krenare për faktin që ka mbijetuar. (Koha)
