Askush nuk do ta kishte menduar që Grupi B i Champions League, aty ku janë Benfica, Napoli e Beshiktash i Stambollit do të ishte i ekuilibruar dhe me luftë deri në minutën e fundit. Faza e grupeve ende nuk i ka njohur të gjithë të kualifikuarit, me ndeshjet e fundit që luhen sot e nesër, por nëse në dy grupe të tjerë luftohet vetëm për një vend, Grupi B është i gjithi enigmë, me tri skuadra që synojnë dy vendet e para.
Benfica pret Napolin ndërsa Beshiktash shkon në Kiev, përballë Dinamos së eliminuar. Benfica e Napoli kanë nga 8 pikë, turqit 7. Një fitore e Beshiktashit e kualifikon direkt, pavarësisht rezultatit në Lisbonë. Skuadra e Stambollit kalon edhe me barazimin, në rast se Benfica fiton kundër Napolit, duke lënë në vend të tretë italianët, me të cilët ka një fitore e një barazim. Nëse Beshiktash fiton kundër Dinamos, skuadrës portugeze i duhet patjetër të fitojë, për shkak se ka humbur 2-4 në Napoli dhe përfundimi me pikë të barabarta e eliminon. Napolit i mjafton barazimi për të siguruar të paktën vendin e dytë. Benfica kalon edhe në rast humbjeje, me kusht që Beshiktash të mos fitojë në Kiev, por ky është një skenar i rrezikshëm, pasi nuk mund të shpresojë te të tjerët.
Fitorja i duhet edhe Portos, në Grupin G, për të mos pasur surpriza të pakëndshme. Portugezët presin Leicester, tashmë i kualifikuar. Porto ka dy pikë më tepër se Kopenhaga, e cila luan në Belgjikë kundër Brugge, me të gjitha humbje.
Në rast fitoreje të Kopenhagës, Portos nuk i mjafton barazimi, pasi të dyja skuadrat do të shkonin në nëntë pikë, por danezët kanë rezultat më të mirë në përballjet direkt, 0-0 në shtëpi dhe 1-1 në Portugali.
Më i thjeshtë skenari në Grupin H, ku Lyon pret Sevillan. Spanjollët kanë tri pikë më tepër se francezët dhe fitoren 1-0 në ndeshjen e parë. Lyonit i duhet të fitojë me dy gola diferencë për t’u kualifikuar, çdo rezultat tjetër, përfshirë edhe fitoren 1-0 të francezëve, i hap rrugën për më tej Sevillas. Spanjollët mund të zënë edhe vendin e parë, në rast se fitojnë në Lyon dhe Juventus nuk fiton në shtëpi me Dinamo Zagreb.
Në të tre grupet e mësipërm, skuadra e vendit të katërt nuk ka shanse kualifikimi në Europa League, ku do të shkojnë tri skuadra që do të humbasin betejën për Champions.
Në katër grupe të tjerë, vendi i tretë nuk është pëcaktuar ende dhe në dy prej tyre ka përballje direkt.
PSV Eindhove pret Rostovin e Rusisë dhe i duhet fitorja për t’u barazuar në pikë e për të kaluar më tej me rezultate më të mira në përballje direkt, pas barazimit në Rusi.
Tottenham pret CSKA-në e Moskës dhe i mjafton barazimi për t’u kualifikuar.
Në Grupin A, Bazeli pret Arsenalin ndërsa Ludogorets luan në Paris. Kanë nga dy pikë, bullgarët të favorizuar nga përplasjet direkt dhe kalojnë në rast se të dyja humbasin. Kundërshtarët, Arsenal dhe PSG, duelojnë në distancë për vendin e parë.
Në Grupin F, Legia e Varshavës pret Sportingun, me detyrimin për fitore. Në këtë grup, Real Madrid duhet të fitojë me Borussia Dortmund në “Bernabeu” për të zënë vendin e parë.
d.i.
Champions, Grupi B i gjithi enigmë: Tri skuadra luftojnë për dy vende
