Sekretari amerikan i Shtetit, Marco Rubio, deklaroi se ka pasur “disa përparime” në bisedimet me Iranin, por theksoi se ende nuk është arritur një marrëveshje dhe se nevojitet më shumë punë.
“Ka pasur njëfarë progresi. Nuk do ta mbivlerësoja, por as nuk do ta nënvlerësoja”, tha Rubio pas takimit të ministrave të Jashtëm të vendeve të NATO-s në Suedi.
Ai shtoi se SHBA-ja vazhdon kontaktet me ndërmjetësit pakistanezë që janë të përfshirë në negociatat me Teheranin.
Sipas Rubios, presidenti Donald Trump preferon arritjen e një marrëveshjeje përmes negociatave, por shqetësimi kryesor mbetet që Irani të mos sigurojë armë bërthamore.
“Ka ende shumë punë për t’u bërë. Nuk kemi arritur ende aty, por do të vazhdojmë të përpiqemi”, deklaroi ai.
Rubio paralajmëroi gjithashtu se nëse negociatat dështojnë, SHBA-ja ka edhe “opsione të tjera”.
Ai theksoi se çështjet kryesore në diskutim janë programi iranian i pasurimit të uraniumit dhe siguria në Ngushticën e Hormuzit, një nga rrugët më të rëndësishme detare për tregtinë globale të naftës.
Ndërkohë, sipas Reuters, një delegacion negociator nga Katari mbërriti në Teheran në koordinim me SHBA-në për të ndihmuar në arritjen e një marrëveshjeje dhe zgjidhjen e çështjeve të mbetura pezull.
Rubio sqaroi se Pakistani mbetet ndërmjetësi kryesor në bisedimet me Iranin, ndërsa vendet e Gjirit po ndiqen nga afër për shkak të interesave të tyre në rajon.
Paralelisht, rrjeti saudit Al-Arabiya publikoi atë që e quajti “drafti final” i një marrëveshjeje të mundshme mes SHBA-së dhe Iranit për t’i dhënë fund konfliktit.
