Tramezzani tashmë nuk do të jetë më zëvendëstrajner i Kombëtares Shqiptare. Ai është larguar drejt Zvicrës për të drejtuar ekipin e Luganos, ku, sipas mediave, ka thirrur së fundmi edhe futbollistin shqiptar, Armando Sadiku.
Tramezzani njihet shumë mirë në Shqipëri, duke qenë për vite me radhë pjesë e pankinës shqiptare, siç mund të dihet edhe që më parë ai ka qenë futbollist në Itali, por edhe që ka një vajzë, të cilën, për shkak të një fotoje miqësore, mediat e bënë të dashurën e Armando Sadikut, një thashethem që Tramezzani, Sadiku, por edhe e ëma e vajzës dhe vetë 20-vjeçarja e mohuan. Madje Desiree Tramezanit iu desh të thoshte, edhe që ajo ka një histori tjetër dashurie dhe këto lajme e kishin mërzitur. Këto janë faktet e njohura, por pak dihet për marrëdhënien e veçantë që Paolo Tramezzani ka me të bijën.
Po të lexosh mediat italiane, në vitin 2003, trajneri italian, është në qendër të lajmeve sportive për një fakt shumë të rrallë. Ai, 33 vjeç në ato vite, një nga mbrojtësit më të kërkuar, kishte hequr dorë nga serie A, ku do të luante me Empolin, për të qëndruar pranë së bijës, 7 vjeçe, Desiree, edhe pse në atë moshë, mund të ishte shansi i fundit për të luajtur në kategorinë e parë. Ai ishte ndarë nga bashkëshortja dhe jetonte me të bijën në Milano. Nga dashuria ndaj saj dhe ndjenja e detyrës së babait, Paolo mori një vendim që pak futbollistë do e merrnin.
“Në mes Serisë A dhe vajzës sime, nuk kam pasur dyshime të zgjedh këtë të dytën”, ka thënë në atë kohë në media Tramezzani, i cili ka shtuar që ka një jetë edhe jashtë futbollit dhe aty ka gjëra më të rëndësishme sesa karriera. Duke qenë që nuk ishin zgjidhur në kohë disa çështje familjare dhe logjistike, për të sistemuar të bijën, Tramezzani kishte vendosur për të hequr dorë nga kontrata me Empolin që të mos largohej nga e bija, e cila jeton me të. Ai ishte ndarë që para gjashtë vitesh nga bashkëshortja, me origjinë bullgare, që kur vajza ishte vetëm 1 vjeçe dhe kujdesej për vajzën.
Pasi e mbylli rrugën për te Empoli, ish-futbollisti i Interit, Tottenham-it, Piacenza-s dhe Atalanta-s, edhe pse një nga mbrojtësit më të mirë të asaj kohe, mbeti pa skuadër. Ai shpresonte që do të gjente një klub pranë qytetit të Milanos, ku jetonte, në çfarëdo kategorie.
Pak muaj më vonë, në mediat italiane që dikur shkruanin artikuj me tituj “Dua të bëj rolin e babait”, apo “Tramezzani: Heq dorë nga Empoli, për time bijë”, gjen shkrimin “Fund i lumtur për Tramezzani-n”.
Mbrojtësi italian ishte kërkuar nga një skuadër e kategorisë së tretë, pranë Milanos.
“Pak muaj pasi refuzoi Empolin, Paolo Tramezzani, ka sërish një skuadër. Ka frimosur me Pro Patria. Nuk ndodh shpesh që një lojtar të vendosë me vullnet të lirë të zbresë nga seria A në C1. Vetëm në rast se bëhet fjalë për një zgjedhje jete. Një koncept i abuzuar, në futboll, zgjedhjet e jetës. Shërben shpesh për të justifikuar transferimet dhe tradhtitë milionëshe dhe situata të leverdisshme, por historia e Tramezzani është ndryshe. Kthehet në C1, 14 vjet pas asaj që ka qenë hera e parë dhe e vetme e tij, në Prato, për një zgjedhje zemre. Pasi i kishte skaduar kontrata me Atalanta-n në qershor Tramezzani ishte thirrur në korrik nga Empoli, në serie A. Ai kishte firmosur, por më pas kishte pasur shumë probleme personale.
Tramezzani ka një vajzë 7 vjeçe, ishte i bindur që do e merrte me vete në Toscana, por nuk i është dhënë leja nga ish-bashkëshortja. Të pranonte Empolin, donte të thoshte shumë për të. Mbrojtësi biond nuk ngurroi për asnjë çast: prishi kontratën në pritje për të gjetur një skuadër që i lejonte të mos largohej nga Milano. Ajo skuadër tani është gjendur, e ka emrin Pro Patria dhe Tramezzani kthehet të jetë futbollist profesionist. Është e vështirë të jetosh pa futboll në moshën 33 vjeç? «Jo, ndoshta sepse nuk ishte një vendim i menjëherëshm, por zgjedhja ime. Ka qenë një periudhë e mirë, prej një jete nuk rrija në shtëpi, edhe të dielën. Më shërbeu shumë». Tre muaj jetë e qetë, pa stërvitje, tërheqje, udhëtime. Vetëm dashuria e partneres së tij dhe të bijës”, shkruanin mediat italiane.
Sot, Tramezzani është baba edhe i një vajze tjetër, katër vjeçe dhe marrëdhënia e motrave është e shkëlqyer, ato e ndjekin shpesh të dyja të atin, që Desiree, nuk ngurron ta quajë “heroi im” apo “mbreti im”. Dhe Tramezzani ka një arsye më shumë për t’u thirrur hero./class/a.k
