Vera në Itali do të thotë vapë pa fund dhe ditë të gjata me diell, sidomos në qytete të bëra nga shtresa guri si Firence dhe Roma, të cilët kanë tendencë të nxehen si furrë picash.
Edhe ata që arratisen në det do ta gjejnë mesditën si kohën më të përshtatshme për t’u ulur në një apartament të errët dhe të freskët, për të ulur grilat dhe për të qëndruar larg rrezeve të diellit.
Koha më e mirë për të gatuar, nëse duhet patjetër që të ndizni sobën (harrojeni furrën) është natën vonë kur mund të qëndroni përballë tenxheres që zien dhe të përgatisni diçka, që mund ta hani të ftohtë ditën tjetër.
Mund të gatuani përshembull oriz farro për ta konsumuar në një sallatë të ftohtë, ose të skuqni kunguj verorë, të cilëve iu hidhni sipër uthull dhe gjethe mendre etj.
Ose mund të duroni 10 minuta nxehtësi për të shijuar më pas një supë kremoze qiqrash, që është akoma dhe më e mirë kur e hani në temperaturë dhome.
Por, megjithatë, në stinën e nxehtë janë akoma më të mirë ushqimet që nuk gatuhen.
Copat e holla të proshutës toskane me kripë të shoqëruara me pjepër të ëmbël dhe plot lëng janë shpesh e gjitha çfarë italianët hanë për drekë. Ose një sallatë klasike kapreze e përgatitur me domate dhe me djathë kremoz mozzarella.
Sallata Panzanella, e përgatitur me copa buke të ndenjur të zbutura në ujë, domate, kastravecë dhe borzilok është sallata e preferuar verore në Toskanë. Mund të provoni të shijoni edhe një panzanella të gjelbër, pa domate.
Tjetër alternativë zgjedhjeje është sallata siçiliane me ullinj të gjelbër. Kjo sallatë e freskët dhe e thjeshtë e marrë nga siçilianët e përgatitur me ullinj të gjelbër të shtypur, mendër dhe gjethe selinoje është një mënyrë e mirë për të luftuar të nxehtin.
Sigurisht, mund të konsumoni edhe ëmbëlsira të ngrira, si granite limoni, diçka midis sorbet dhe slushi, të cilën siçilianët e pëlqejnë ta konsumojnë edhe për mëngjes të shoqëruar me briosh.
Një gjë që është vërtet shumë e freskët dhe shijon në këto ditë të nxehta gjatë orëve të mbasdites është kafe shakerato: kafe ekspres e tundur dhe e përzier me sheqer dhe akull derisa bëhet me shkumë dhe kremoze./shije.al/a.k
