Ka reaguar avokatja e shtetit Alma Hicka, e akuzuar penalisht nga KLSH për cështjen e CEZ. Zonja Hicka shprehet e keqardhur duke theksuar se para se asaj ti mbërrinte raporti, KLSH e publikoi këtë të fundit në media. Avokatja e përgjithshme e shtetit, në cilësinë e saj si ekperte dhe njohëse e cështjes së CEZ ka theksuar se problematika nis tek mënyra e privatizimit të sektorit energjitik si dhe shton se ka një porositës të këtij auditimi nga ana e KLSH.
“E kuptoj urgjencën e depozitimit ditën e mërkurë, duke pasur parasysh të enjten e akuzave dhe sharjeve, aty ku edhe akuzat e ngritura në të ashtuquajturin kallëzim të KLSH-së, u diktuan disa të enjte me radhë nga porositësi i tyre, në foltoren e Kuvendit të Republikës së Shqipërisë.”- thekson avokatja.
Alma Hicka e konsideron auditimin si një fasadë ose një pseudohetim.
“Si profesioniste mund të them me siguri se çështja CEZ e ka gjenezën tek mënyra e privatizimit, tek marrëdhëniet klienteliste me investitorin gjatë qëndrimit të tij këtu dhe tek ekseset e paligjshme të epilogut të një marrëdhënieje të sëmurë Shtet – CEZ. Këto janë shkaqet që prodhuan përfundimisht dështimin e privatizimit.
Nuk ia vlen asnjë fjalë për kompetencën e këtij të ashtuquajturi auditim me pasojë një të ashtuquajtur kallëzim. Sepse ca gjoja hetues që vinin vërdallë nëpër zyrat tona sa herë nuk kuptonin shënimet që kishin marrë me vete për të mbështetur porosinë, me ngjallin vetëm keqardhje”- shkruan ajo.
