Ish-Kryeministri Sali Berisha ka vijuar akuzat ndaj kryeministrit Edi Rama lidhur me aferën e CEZ. Në një takim me gazetarët, ish-Kryeministri Berisha tha se marrëveshja me CEZ për t’u tërhequr nga arbitrazhi ndërkombëtar si dhe nga vetoja për marrjen e statusit kandidat nga ana e Çekisë për vendin tonë, tregon sipas tij se kjo është një aferë korruptive e Edi Ramës.
Për këtë arsye Berisha tha se ky është një nga pazaret më të fëlliqur të Ramës, për të cilën duhet bërë një hetim ndërkombëtar. Sipas Berishës, hetimi ndërkombëtar duhet bërë që nga dita e parë e ardhjes së CEZ në Shqipëri e deri ditën që u arrit marrëveshja e pajtimit me qeverinë shqiptare kundrejt pagesës nga ana e e vendit tonë të rreth 100 milionë eurove.
“Ministri Ahmetaj tha se marrëveshja me CEZ është firmosur në zyrën e tij. Fakti që 30 minuta më pas Çekia tërhoqi veton, tregon se ky është një nga pazaret më të fëlliqur të Edi Ramës në të cilën mund të jenë ndarë dhjetëra milionë euro. Kurrë një qeveri e një vendi anëtar të BE-së nuk mund të ngatërrojë një marrëveshje tregtare në një çshtje bllokimi. Nuk po bllokohej Shqipëria por BE-ja. Dhe faturën e paguan shqiptarët. Unë dua të ju them vetëm një moment. Kërkesës së palës çeke për ta zgjidhur me pajtim, ne në takimin e Vjenës iu përgjigjëm preraz jo. Pala çeke në na kërkoi t’i jepnim 85 milionë dhe jo 100 milionë euro sa dhanë këto. E dyta, çështja e DIA-s do të merrej nga pala çeke. Çfarë i tha avokati ynë? Zotërinj i detyroheni qytetarve shqiptarë së paku me fatura 500 milionë euo. Jeni ju i gatshëm t’i paguani këto që ta mbyllim me marrëveshje? Pala CEZ-it u përgjigj jo. Atëherë mbetet arbitrazhi ndërkombëtar. Por gjithçka u rrokullis sipas Edi Ramës dhe aleancës së qelbësirave që e përdorën bllokimin e tre ligjeve. Ndaj jam sot këtu t’i bëj thirrje Edi Ramës të bëhet hetim ndërkombëtar për CEZ nga dita e parë e ardhjes së tij në Shqipëri deri në ditën famëzezë të gjobitjes së qytetarëve shqiptarë me 1200 euro nga kompania e cila në vendin tonë falimentoi. Ndaj mendoj se z.Kopac ta falenderoj edhe unë për dëshminë që bëri. Po hetimi do të jetë ndërkombëtar, dhe ligji i dorëzuar nga PD është i shkëlqyer i bazuar nga hetime të suksesshme ndërkombëtare.” u shpreh Berisha
Në këtë kuadër, ish-lideri demokrat i kërkoj Edi Ramës që të mbështesë hetimin ndërkombëtar, siç u shpreh ai për të ndjekur të njëjtën linjë nga aleati tjetër i mazhorancës Ilir Meta. Kjo pasi sipas Berishës, afera e CEZ është një gjëmë e madhe.
“Unë kur akuzoj Kryeministrin akuzoj edhe Ilir Metën. Por ka një ndryshim, Meta iu bashkangjit kërkesës sime për hetim ndërkombëtar. Unë dua që të bëhet transparencë e plotë për këto hetime. Dhe jo të përdoret për kapje nga aleanca e qelbësirave sepse qytetarët nuk fitojnë asgjë. Edi Rama i shkelmoi me të dyja këmbët. Dosja është aty. Avokati ynë nga më të shkëlqyerit na dha garanci se çështja është e fituar. Dhe ne ishim të sigurtë se në arbitrazh do të fitonim. Ndërsa kjo u ka kushtuar shqiptarëve sa nuk ka kushtuar e gjithë kaskada e Drinit. Është aferë e tmerrshme. Unë kërkoj hetim integral të kësaj çështje. Unë kam 0 përfitim. E konsideroj hap të rëndësishëm që një forcë e mazhorancës mbështet hetim ndërkombëtar, sepse CEZ është kompania e 5 më e mirë në Evropë për energjinë. Por ne ishim të sigurtë në këtë betejë. Ndërsa këtë i kanë bërë Shqipërisë një gjëmë të madhe. Edhe Rama sa erdhi në pushtet fliste se kemi përzënë CEZ a thua se ishte punonjës i CEZ. Po i fliste xhepi dhe jo goja.” theksoi Sali Berisha
