Presidenti Donald Trump, zëvendëspresidenti JD Vance, si dhe një mori zyrtarësh të lartë të administratës, u zotuan të dielën (21 shtator) në forcimin e misioni i aktivistit konservator, Charlie Kirk, i vrarë rreth dy javë më parë gjatë një aktiviteti në universitetin e Utahut.
Në një shërbim përkujtimor në Glendale të Arizonës, ku morën pjesë dhjetëra mijëra mbështetës, Kirk u përshkrua vazhdimisht si një martir që do të jetonte përmes lëvizjes së tij.
“Ai është më i madh tani se kurrë më parë. Dhe është i përjetshëm. Ai u vra sepse jetoi me trimëri, jetoi me guxim dhe argumentoi në mënyrë brilante”, tha Trump, duke vënë në dukje se do t’i jepte Kirkut Medaljen Presidenciale të Lirisë.
Gruaja e Kirkut, Erika, mbajti gjithashtu një fjalim në stadiumin Stete Farm pranë Phoenix, ku ndodheshin rreth 100 mijë qytetarë, ku deklaroi se e ka falur vrasësin e dyshuar të burrit të saj.
“Burri im, Çarli, donte të shpëtonte të rinj, njësoj si ai që i mori jetën”, tha ajo, duke shtuar: “E fal sepse kjo është ajo që bëri Krishti. Përgjigja ndaj urrejtjes nuk është urrejtja.”
Lista e folësve përfshinte anëtarë të organizatës së Kirkut, Turning Point USA, e cila përqendrohet në aktivizmin konservator në kampuset e kolegjeve, figura të njohura në lëvizjen konservatore, zyrtarë të administratës Trump dhe ata që thanë se ishin formuar nga puna e Kirkut dhe botëkuptimi i krishterë i krahut të djathtë.
Ata theksuan nevojën për të vazhduar aktivizmin e 31-vjeçarit Kirk, i cili u qëllua për vdekje gjatë një takimi me studentët në një universitet në Utah. Kirk u përshkrua vazhdimisht si një martir dhe u cilësua si një figurë historike për lëvizjen konservatore.
Brenda tribunave dhe në skenë në stadiumin State Farm, Kirk u nderua si një aktivist për lirinë e fjalës dhe një mobilizues i votës së të rinjve për Trump.
