Lady Gaga do ta udhëheqë atë që organizatorët e quajnë “kontribut profesional” ndaj këngëtarit të ndjerë britanik, David Bowie, në ceremoninë e sivjetme të shpërblimeve “Grammy”, e cila do të mbahet këtë muaj. Akademia e incizimeve ka bërë të ditur se Gaga do t’i performojë tri prej katër këngëve të Bowie-t, i cili njihet për kreativitetin dhe eksperimentimin në muzikë dhe vlerësohet lart për karrierën e tij, e cila daton pesë dekada prapa.
Vdekja e papritur e David Bowie-t në moshën 69 vjeçare i shokoi tej mase adhuruesit e tij në mbarë botën, pasi ata nuk e kishin pasur idenë që muzikanti vuante nga kanceri. Këngëtari ndërroi jetë vetëm dy ditë pas lansimit të albumit të tij të ri muzikor, me titull “Blackstar.”
Gaga, fituese e gjashtëfishtë e çmimit Grammy, po ashtu njihet për rishpikjen e imazhit të saj në skenë disa herë që nga viti 2008, kur filloi të bëjë famë në mbarë botën. Këngëtarja tashmë ishte caktuar të performojë në ceremoninë e ndarjes së shpërblimeve kryesore në muzikë, atyre Grammy, në mbrëmjen e 15 shkurtit në Los Angeles.