Presidenti Biden dhe gruaja e tij Jill kanë mirëpritur Donald Trump dhe Melania në Shtëpinë e Bardhë. Ata do të ulen për çaj, përpara se të nisen për në Kapitol.
Është hera e parë që dyshja takohen sot.
“Mirë se vini në shtëpi”, i tha Biden Trumpit, raporton CNN.
Zakonisht pas shërbimit të mëngjesit, presidenti i zgjedhur, zëvendëspresidenti i zgjedhur dhe bashkëshortët e tyre zakonisht vizitojnë Shtëpinë e Bardhë, ku presidenti i zgjedhur dhe presidenti në largim mbajnë një takim të shkurtër privat.
Presidenti i zgjedhur Donald Trump së bashku me bashkëshorten e tij Melania Trump e nisi ditën e ceremonisë së betimit Presidencial me një vizitë në Kishën e Shen Gjonit ne Washington DC.
Presidenti i zgjedhur Trump mbante veshur një pallto të gjatë ngjyrë të zezë ndërsa bashkëshortja e tij Melania kishte veshur një kostum shik në nuancë blu të errët.
Çifti presidencial u prit në hyrje të Kishës së Shën Gjonit nga famulltari i Kishës që ndodhet pranë Shtëpisë së Bardhë.
Në moshën 78-vjeçare, Trump do të jetë presidenti më i moshuar që do të betohet ndonjëherë në detyrë dhe do të gëzojë shumicën republikane në të dy dhomat e Kongresit, të cilat janë spastruar pothuajse tërësisht nga çdo kundërshtar brendapartiak, raporton agjencia e lajmeve Reuters.
