Asnjë përfaqësues i selive diplomatike të huaja në vendin tonë, që nga SHBA e BE, nuk ka qenë i pranishëm në ceremoninë e betimit të tre anëtarëve të Gjykatës Kushtetuese, që ka zhvilluar Presidenti i Republikës, Ilir Meta mbrëmjen e së enjtes, me të cilëve ishte edhe Marsida Xhaferllari, e cila u dekretua nga Meta jashtë afateve ligjore dhe jashtë listës me tre të parët të KED, e përcaktuar qartë në Kushtetutë.
Vetë kreu i shtetit njoftoi se sot ka bërë dekretimin e tre anëtarëve të Gjykatës Kushtetuese, Elsa Toska, Fiona Pajajorgji dhe Marsida Xhaferllari, por ajo që konstaton Realstory.al nga video e shpërndarë nga Presidenca është mungesa e diplomatëve të huaj, të cilët ishin të pranishëm në ceremoninë e betimit të anëtarit të parë të Gjykatës Kushtetuese Besnik Muçi.
Në ceremoninë ndaj Muçit ishin të pranishëm ambasadori i BE, Luigi Soreca, zëvendës ambasadori i SHBA, Dan Koski, ambasadori italian Alberto Cutillo, ambasadori gjerman, Peter Zingraf, dhe ajo franceze, Christine Vasac. Ndërsa në ceremoninë e së enjtes, asnjë diplomat nuk ka qenë i pranishëm. Ceremonia është zhvilluar vetëm në praninë e stafit të Presidentit, të afërmve të personave të betuar dhe dy anëtarëve aktualë të Gjykatës Kushtetuese, Vitore Tusha dhe Besnik Muçi.
Në lidhje me mungesën e diplomatëve të SHBA dhe BE, por edhe të vendeve të tjera anëtare të BE, Realstory.al pyeti pranë selive diplomatike nëse ata kanë pasur një ftesë nga Presidenti Meta për ceremoninë e sotme dhe mbi arsyet e mospjesëmarrjet.
Një nga ambasadorët tha për Realstory.al se po e shikonte ceremoninë nga TV. “Shoh në sallë vetëm pjesëtarë të stafit dhe të afërm të anëtarëve. Nuk e di si janë ndarë ftesat, por herën e parë na ka ardhur ftesë”, deklaroi diplomati i huaj, duke konfirmuar se Presidenti Meta nuk ka shpërndarë ftesa për ambasadorët e huaj në vendin tonë, ashtu siç veproi në rastin e Besnik Muçit.
Nuk dihet arsyeja përse Meta nuk ka shpërndarë ftesa për diplomatët në ceremoninë e tre gjyqtarëve të Gjykatës Kushtetuese, por ajo që dihet është se kreu i shtetit vetëm një ditë më parë i sulmoi ambasadorët si të korruptuar. “Ua kam thënë edhe disa diplomatëve të korruptuar, ne kemi bërë një marrëveshje që asnjë ditë Shqipëria nuk do të mbetet pa gjykatë funksionale”, deklaroi Meta një ditë më herët, kur doli për të mbrojtur dekretin për Xhaferllarin, ndërsa sot mund të ketë pasur frikë se ndonjë prej tyre nuk i shkon për shkak të saj.
Megjithatë, ajo që konstatohet është se deri më sot SHBA dhe BE kanë përshëndetur zgjedhjen e dy anëtarëve të Gjykatës Kushtetuese nga ana e Kuvendit të Shqipërisë, Elsa Toska dhe Fiona Papajorgji, ndërkohë që kanë qenë të pranishëm për ceremoninë e betimit të Besnik Muçit, por nuk kanë bërë asnjë deklaratë mbi dekretin e Metës për Xhaferllarin. E vetmja deklaratë që vjen nga ndërkombëtarët mbetet ajo e zëdhënëses së Bashkimit Evropian, Maja Kocijancic, e cila u bëri thirrje të gjitha institucioneve shqiptare të përfshira që konflikti i interpretimit mbi përbërjen e Gjykatës Kushtetuese të zgjidhet sa më shpejt dhe të qartësohet kjo çështje.
/a.r
