Presidenti Ilir Meta në fjalën e tij përshëndetëse i ka uruar qeverisë së re rezultate sa më shumë pozitive në zhvillimin e vendit dhe përmirësimit të cilësis së jetës së qytetarëve. Meta ka nënvizuar se qyetarët presin shumë nga Kuvendi i ri, qeveria, mazhoranca dhe opozita. “Presim shumë për reformën në drejtësi e forcimin e shtetit ligjor, si dhe zhvillimin ekonomik. Axhanda e integrimit mbetet një përparësi. Duhet të vijojë lufta kundër korrupsionit dhe krimit të organizuar. Roli i Shqipërisë është kyç për stabilitetin e rajonit. Përmes bashkëpunimit mund të sigurojmë një perspektivë europiane. Jam i gëzuar që qeveria e ka cilësuar 2018 vit të Skënderbeut dhe unë do e mbështes fuqimisht.
Ceremonia
Sapo ka nisur ceremonia e betimit të ministrave në Presidencë, ceremoni e cila ka nisur me ekzekutimin e himnit kombëtar. Në këtë ceremoni marrin pjesë që nga Presidenti, kryeministri dhe të gjithë ministrat e kabinetit ‘Rama 2’.
Më pas është lexuar dekreti i Presidenti Ilir Meta për emërimin e këshillit të ministrave me propozim të kryeministrit. Presidenti ka dekretuar ministrat e propozuar nga kryeministri Edi Rama.
Duke filluar që nga kryeministri Rama të gjithë ministrat janë betuar dhe kanë firmosur dokumentin e dekretimit. Më pas ata kanë shtrënguar duart me presidentin, Ilir Meta.
***
Pas miratimit në Parlament të kabinetit qeveritar, ministrat pritet të bëjnë betimin e tyre pranë Presidentit të Republikës, Ilir Meta.
Kreu i Shtetit ka mbërritur në selinë e Presidencës, ndërsa ceremonia pritet të zhvillohet në orën 17:00.
Tanimë ka nisur mbërritja e ministrave të rinj.
Kabineti i ri qeveritar ka 14 ministra, shumë më i vogël në numër se kabineti i shkuar i qeverisë “Rama 1”.
Ndërkohë, është zbardhur edhe rendi i ditës i mbledhjes së parë të qeverisë së drejtuar nga kryeministri Edi Rama.
Ashtu sikurse është paralajmëruar më herët nga vetë Rama, vendimi i parë do të jetë shpallja e vitit 2018 si vit i Skënderbeut, ku edhe do të ngrihet një komision i posaçëm.
Gjithashtu, do të miratohet procedura e përzgjedhjes së kandidatëve të komisionit të prokurimit publik, do të miratohen rregullat për përfitimin e shërbimeve publike elektronike, si dhe dhënia e dy godinave për ngritjen e organeve të reja të Vettingut. /b.d
Presidenti Meta dekreton emërimin e zotit Pandeli Majko, Ministër Shteti për Diasporën
