Gara për Bashkinë e Tiranës mund të ketë një tjetër emër nga radhët e aktivistëve të protestës. Edlira Çepani nuk e ka përjashtuar mundësinë e kandidimit për drejtimin e kryeqytetit, por ka vendosur një kusht: propozimi duhet të vijë nga sheshi dhe të mbështetet nga të gjitha partitë opozitare.
E ftuar në emisionin “Off the Record” të Andrea Dangllit në A2 CNN, Çepani u pyet drejtpërdrejt nëse e shihte veten si kandidate të mundshme për Tiranën dhe nëse mund të ishte një emër konsensual për opozitën.
Përgjigjja nuk ishte një “jo”.
“Ka një lojtar të ri shumë të fortë, që është sheshi, është protesta”, deklaroi Çepani, duke argumentuar se kandidati duhet të dalë nga qytetarët dhe më pas të marrë mbështetjen e partive opozitare.
“Ambicia s’duhet të jetë individuale. Kur të vijë nga sheshi mund të shqyrtohet”, u shpreh ajo, duke lënë të hapur mundësinë e kandidimit.
Sipas Çepanit, opozita duhet të shkojë në zgjedhje me një kandidat të vetëm, pasi përçarja e votave do të favorizonte Partinë Socialiste.
Deklarata e saj vjen në një moment kur brenda opozitës qarkullojnë disa emra për Bashkinë e Tiranës, ndërsa ende nuk ka një marrëveshje për mënyrën e përzgjedhjes së kandidatit të përbashkët.
Çepani nuk e shpalli kandidaturën, por as nuk e përjashtoi veten nga gara. Për momentin, ia ka lënë propozimin protestës dhe vendimin një marrëveshjeje më të gjerë opozitare.
Me këtë deklaratë shtohet edhe një emër në listën e kandidatëve të mundshëm për Tiranën, ndërsa zvogëlohet çdo ditë koha që opozita ka në dispozicion për të gjetur një kandidat të përbashkët ose për të arritur një marrëveshje. Paradoksi është se të gjithë flasin për bashkim rreth një emri, ndërkohë që lista e emrave vetëm zgjatet. /vna.al












Ik moj kukuvajke boll me hipokrizi o kubanezja e Shqiperise e perkedhelura e perjertshne.