Në një prononcim për mediat, kryetari i KQZ-së, Ilirjan Celibashi është shprehur se nuk janë evidentuar problematika në lidhje me pajisjen e identifikimit elektronik të votuesve në Rrogozhinë. Celibashi thotë se përgjithësisht procesi i votimit në Rrogozhinë po shkon mirë.
“Ka pasur pak problematika, të cilat nuk kanë krijuar impakt në mbarëvajtjen e mëtejshme të procesit të votimit. Nuk kemi pasur problematika në lidhje me pajisjen identifikuese të votuesve, pra pajisjen elektronike në të gjitha qendrat e votimit. Përgjithësisht është duke shkuar mirë procesi.“
Referuar problematikës së shfaqur në një prej qendrave të votimit në këtë këtë bashki për fotografimin e votës, Celibashi ka thënë se është një nga shkeljet më të rënda të procesit zgjedhor, dënimi për të cilën shkon nga 3 muaj deri në 3 vite burg.
“Fotografimi i votës përben një ndër shkeljet e rënda penale përsa i përket procesit zgjedhor. Ka sanksione që shkojnë nga 3 muaj deri në 3 vjet burg dhe do ta adresojmë pasi të marrim të gjithë informacionin e mundëshëm. Kandidatët të evitojnë deklarimet e tyre me përmbajtje elektorale. E kanë të ndaluar të bëjnë thirrje për t’u votuar. Nuk kanë asnjë arsye ligjore që të shkojnë në qendrat e votimit dhe të vëzhgojnë procesin e votimit. Kemi marrë njoftim që në Lekaj kishte grumbullim të personave të paautorizuar. Kjo tashmë është normalizuar. Komisionarët e QV-së duhet ta adresojnë këtë problematikë”, tha Celibashi.
