Një numër më i madh pacientësh të prekur nga sëmundjet tumorale do të marrin shërbimin e kimioterapisë gjatë një dite, falë investimit të realizuar më së fundmi në Qendrën Spitalore Universitare “Nënë Tereza” pas hapjes së spitalit ditor. Ky spital do të ofrojë shërbimin e njohur si “Day Hospital”, për të gjithë ata qytetarë, të cilët kryejnë seancat e kimioterapisë, ndërkohë që investimi i bërë garanton edhe përgatitjen e medikamenteve pranë kapave (aparaturave të specializuara), dhe jo më në mënyrë manuale siç kryej disa vite më parë.
Projekti i financuar nga IADSA, Programi i Konvertimit të Borxhit Italo-Shqitar për Zhvillim, përmirëson shërbimin për rreth 50 pacientë të cilët do të kryejnë kimioterapinë, por sjell edhe një mënyrë të re të ofrimit të këtij shërbimi. Mjekët e këtij institucioni e cilësojnë këtë investim si më të suksesshmit, pasi shkurton kohë në ofrimin e shërbimit, dhe për rrjedhojë, ka më shumë përfitues gjatë një dite.
“Ky është një mjedis i rinovuar për trajtimin me kimioterapi, që ne e quajmë ‘spitali ditor’. Një mjedis mjaft cilësor, por jo vetëm cilësor në drejtim të mënyrës së ofrimit të medikamenteve të cilat do të merren në formë shumë më të modernizuar nëpërmjet pompave elektrike. Preparatet të cilat përgatiten në kapën qendrore të spitalit dhe vijnë të gatshme direkt për aplikim. Përveç kësaj, ky investim do të bëjë të mundur edhe rritjen e numrit të pacientëve të cilët do të marrin aplikimet në ditën e kimioterapisë, pasi është një dyfishim apo trefishim i pacientëve që mjekonim më parë. Nëse më parë kishim 6 poltrone sot kemi dyfishin e tyre të cilat do të xhirohen dy apo tre herë mesatarisht në një ditë” ka pohuar Shefja e Shërbimit të Kimioterapisë, Dr. Dhurata Tarifa.
Nga ana tjetër, Drejtorja e Qendrës Spitalore Universitare “Nënë Tereza”, zj. Ogerta Manastirliu, e ka cilësuar këtë si një nga projektet më të rëndësishme që u shërben jo vetëm pacientëve, por edhe stafit të mjekëve dhe infermierëve. “Ky është një projekt shumë i rëndësishëm për shërbimin e Onkologjisë pranë Spitalit Universitar “Nënë Tereza”. Një projekt i financuar nga IADSA, projekti Italo-Shqiptar i konvertimit të borxhit, i cili përmirëson shërbimet për spitalin ditor të kimioterapisë për rreth 50 pacientë në ditë, të cilët do të marrin shërbim në këtë spital ditor. Padyshim, ky investim sjell një mënyrë të re të ofrimit të shërbimit, kushte shumë më të mira pune për mjekët, dhe ajo çfarë është e rëndësishme, largon perceptimin e keq për një shërbim që është shumë i rëndësishëm për jetën e pacientëve, Shërbimi Onkologjik,” ka pohuar Manastirliu. Por, në Shërbimin e Onkologjisë, sipas Manastirliut, përveç përmirësimit të mjediseve, po ofrohet edhe një kulturë e re që integron shërbimin psiko-social, për të qënë sa më afër pacientëve që marrin këto trajtime.
Ministri i Shëndetësisë, në prani të ministrit të Financave, z. Arben Ahmetaj, dhe Ambasadorit Italian, z. Alberto Cutillo, deklaroi se ky investim do t’u shërbejë sipas të gjitha standardeve pacientëve që duhet të marrin shërbimin e kimioterapisë. “Siç edhe jemi fokusuar në Programin e Qeverisë, sëmundjet tumorale do të jenë prioritare, përpjekjet e bëra për të furnizuar këtë spital me më shumë barna, për të përfshirë në Listën e Barnave të Rimbursueshme, dhe këtë vit, ajo listë ka më shumë barna. Me shërbimin modern të radioterapisë që ka filluar prej disa javësh. Edhe shërbimi i sotëm, rrit cilësinë e shërbimit, rrit numrin e atyre që shërbehen, por shton edhe elementë të rinj psiko-socialë që në këto sëmundje janë të domosdoshme,” ka pohuar ministri Beqaj, i cili përfitoi gjithashtu nga rasti për të falënderuar Qeverinë Italiane për investimin e kryer. “Padyshim, një falënderim shkon edhe për Qeverinë Italiane dhe nëpërmjet ambasadorit Italian që borxhin e hershëm e ktheu në një program për të mbështetur përsëri Shqipërinë” ka theksuar kreu i shëndetësisë. Ndërkohë që Ambasadori Italian në vendin tonë ka theksuar se Italia do të vazhdojë të mbështesë Shqipërinë edhe në projekte të tjera në fushën e shëndetësisë.
Fjala e Ministrit të Shëndetësisë, Ilir Beqaj:
Ajo çka po shohim sot është kurorëzimi i një përpjeke për të përmirësuar ndjeshëm shërbimin ditor në spitalin tonë të Onkologjisë. Në fakt, është pjesë e projektit “Jo Kancer”, të financuar nga një konvertim i borxhit italian, një program që ka përfshirë elementë të plotë të sëmundjeve që fillojnë, që me parandalimin, me ndërgjegjësimin por praktikisht, deri sa sëmundja vazhdon të jetë e përhapur, na duhet të bëjmë më shumë kujdes edhe për mënyrën se si e ofrojmë shërbimin.
Sigurisht, unë dua të falënderoj Ministrinë e Financave dhe kolegun Arben Ahmetaj që brenda konvertimit të madh të borxhit në tre shtyllat e aplikimeve, shëndetësia ka qenë prioritare. Padyshim, një falënderim shkon edhe për Qeverinë Italiane, dhe nëpërmjet ambasadorit Italian, që borxhin e hershëm e ktheu në një program për të mbështetur përsëri Shqipërinë.
Ne kemi marrë nga shëndetësia tre programe të ndryshme, dhe një nga ato është edhe ky sot, por sigurisht, besoj se do të vazhdojnë përpjekjet, siç edhe jemi fokusuar në Programin e Qeverisë, që sëmundjet tumorale do të jenë prioritare, përpjekjet e bëra për të furnizuar këtë spital me më shumë barna, për të përfshirë në Listën e Barnave të Rimbursueshme, dhe këtë vit, ajo listë ka më shumë barna. Me shërbimin modern të radioterapisë që ka filuar prej disa javësh. Edhe shërbimi i sotëm rrit cilësinë e shërbimit, rrit numrin e atyre që shërbehen, por shton edhe elementë të rinj psiko-socialë që në këto sëmundje janë të domosdoshme.
Në çdo moment nuk duhet të shmangim falënderimin për mjekët dhe infermierët që punojnë këtu në një mjedis jo shumë të këndshëm, me të sëmurë që shkojnë edhe në gjendje terminale, por që me përkushtim vazhdojnë të ofrojnë shërbim cilësor përditë.
Fjala e drejtores së QSUT, Ogerta Manastirliu:
Ky është një projekt shumë i rëndësishëm për shërbimin e Onkologjisë pranë Spitalit Universitar “Nënë Tereza” Një projekt i financuar nga IADSA, projekti italo-shqiptar i konvertimit të borxhit, i cili përmirëson shërbimet për spitalin ditor të kimioterapisë për rreth 50 pacientë në ditë, të cilët, do të marrin shërbim në këtë spital ditor.
Padyshim, ky investim sjell një mënyrë të re të ofrimit të shërbimit, kushte shumë më të mira pune për mjekët, dhe ajo çfarë është e rëndësishme, largon perceptimin e keq për një shërbim që është shumë i rëndësishëm për jetën e pacientëve, Shërbimi Onkologjik.
Kërkojmë që përveç përmirësimit të mjediseve të sjellim kulturën e re, por edhe të integrojmë shërbimet e reja, siç është edhe shërbimi psiko-social, ndaj kemi krijuar edhe mjedise në oborrin e këtij spitali për të sjellë pikërisht këto shërbime të reja për pacientët që marrin trajtime. Kemi kryer investimet tek holli i këtij shërbimi, me sistem të ri pritës për pacientët, me planifikim të orareve qoftë për të gjitha konsultat me mjekun, qoftë për imazherinë dhe për planifikimin e kimioterapisë apo radioterapisë që ofrohen në këtë spital.
Dr. Dhurata Tarifa
Ky është një ambient i rinovuar për trajtimin me kimioterapi, që ne e quajmë “Spitali Ditor”. Një ambient mjaft cilësor, por jo vetëm cilësor në drejtim të mënyrës së ofrimit të medikamenteve, të cilat do të merren në formë shumë më të modernizuar nëpërmjet pompave elektrike. Preparatet të cilat përgatiten në kapën qendrore të spitalit dhe vijnë të gatshme direkt për aplikim. Përveç kësaj, ky investim do të bëjë të mundur edhe rritjen e numrit të pacientëve të cilët do të marrin aplikimet në ditën e kimioterapisë, pasi është një dyfishim apo trefishim i pacientëve që mjekonim më parë. Nëse më parë kishim 6 poltrone sot kemi dyfishin e tyre të cilat do të xhirohen dy apo tre herë mesatarisht në një ditë.
D.I.
