Kremlini ka kërkuar që të mos ngrihen hipoteza të pabaza për shkakun e rënies së avionit në Kazakistan. Zëdhënësi i Kremlinit, Dmitry Peskov bëri me dije se ngjarja është duke u hetuar. Rajoni i Çeçenisë, i cili ishte edhe destinacioni i avionit, është vënë disa herë në shënjestër të ushtrisë ukrainase. Ndërkohë disa media ndërkombëtare, duke cituar burime pranë qeverisë së Azerbajxhanit kanë konfirmuar se një raketë ruse tokë-ajër shkaktoi rrëzimin e avionit.
Qeveria ruse ka paralajmëruar në mos ngritjen e hipotezave në lidhje me shkakun e rrëzimit të një aeroplani pasagjerësh me destinacion Rusinë që vrau 38 persona në Kazakistan të mërkurën. Pamjet e avionit të rrënuar duket se tregojnë dëmtime të copëzave dhe disa ekspertë të aviacionit sugjeruan se avioni i Azerbajxhanit Airlines mund të ishte goditur nga sistemet e mbrojtjes ajrore mbi republikën ruse të Çeçenisë. Para se të rrëzohej pranë qytetit të Kazakistanit Aktau, avioni u devijua përtej Detit Kaspik, nga destinacioni i tij në Çeçeni në Kazakistanin perëndimor. Njëzet e nëntë nga 67 personat në bord mbijetuan. Azerbajxhani mbajti një ditë zie kombëtare të enjten për viktimat e aksidentit. Për zëdhënësin e Kremlinit, Dmitry Peskov, hetimi për këtë ngjarje është duke u zhvilluar dhe nxjerrja e konkluzioneve të shpejta është e tepërt.
“Siç e keni thënë me të drejtë, hetimi është duke u zhvilluar. Çdo incident i aviacionit duhet të hetohet nga autoritetet speciale të aviacionit. Dhe derisa hetuesit të nxjerrin përfundimet e tyre, do të ishte e gabuar të jepnim çfarëdo hipoteze. Pra, nuk mund ta bëjmë dhe askush nuk duhet ta bëjë këtë. Ne duhet të presim fundin e këtij hetimi”, u shpreh Peskov.
Avioni Embraer 190 u ngrit nga kryeqyteti i Azerbajxhanit Baku mëngjesin e së mërkurës. Ai do të fluturonte për në Grozny në Çeçeni, por u devijua për shkak të mjegullës, tha linja ajrore. Një pasagjer i mbijetuar i tha televizionit rus se besonte se piloti kishte tentuar dy herë të ulej në mjegull të dendur mbi Grozny. Çeçenia tashmë është goditur nga sulmet me dronë ukrainas këtë muaj dhe autoritetet në Ingushetinë fqinje thanë se rajoni rus ishte shënjestruar për herë të parë që nga fillimi i luftës në Ukrainë.
Një qendër tregtare u godit kur një dron u rrëzua në Osetinë e Veriut, duke vrarë një grua, thanë raportet.
