Kreu i Partisë Demokratike ka reaguar mbrëmjen e së enjtes në lidhje me daklaratën e CDU/CSU.
Pas Edi Ramës, edhe Lulzim Basha e falenderon partinë e Agela Merkel, ndërsa ka një interpretim.
Ai shprehet se shqetësimi i gjermanëve lidhet me mungesën e zgjedhjeve të lira, krimin dhe korrupsionin.
Në emër të Opozitës së Bashkuar, Basha shkruan se e mirëpret Gjermaninë që të zgjidhë krizën.
Ndërkohë që në lidhje me apelin për dialog, kryetari i PD nuk ka asnjë koment të drejtpërdrejtë.
“Mirënjohje Gjermanisë mike dhe mbështetëse të Shqipërisë, për vëmendjen dhe shqetësimin ndaj problemeve që kanë penguar integrimin europian, si mungesa e zgjedhjeve të lira dhe të ndershme, lidhjet e politikës me krimin, mungesa e luftës ndaj krimit dhe korrupsionit.
Në emër të PD dhe të Opozitës së Bashkuar konfirmoj gatishmërinë tonë për zgjedhje të lira dhe të ndershme dhe mirëpres angazhimin e Gjermanisë mike për zgjidhjen e kësaj krize dhe hapjen e rrugës europiane të Shqipërisë” – shkruan Lulzim Basha.
***
19:10 – Rama: Dakord me CDU/CSU për dialogun, por 30 Qershori s’është në dorën tonë
Kryeministri Edi Rama ka reaguar pasditen e së enjtes sa i përket deklaratës së partisë gjermane CDU/CSU.
Kjo e fundit kërkonte që palët të gjejnë kompromisin, teksa propozonte edhe shtyrjen e datës së zgjedhjeve. Por kreu i ekzekutivit shqiptar duket se mbetet i palëkundur në qendrimin e tij.
Sipas Ramës, CDU/CSU meriton falenderim për propozimin e dialogut, por ai shton se 30 qershori nuk është në dorën e qeverisë.
“U jam shumë falenderues miqve të Shqipërisë dhe partnerëve politikë të Lulzim Bashës dhe Partisë Demokratike në CDU/CSU, për vëmendjen e tyre ndaj situatës politike!
Krejt dakord me gjithçka kanë shprehur publikisht dhe për nevojën e dialogut pa kushte.
Koha nuk pret sepse 30 qershori s’është në dorën tonë!” – shkruan Edi Rama.
Ditën e sotme, partia e kancelares Merkel u shpreh e gatshme edhe të ndërmjetësojë për një tryezë mes Ramës dhe Bashës. Ndërsa më herët, kryeministri ka deklaruar se ndryshimi i 30 Qershorit i përket Presidentit të Republikës.
***
17:18 – CDU/CSU: Të shtyhet data e zgjedhjeve! Palët të arrijnë kompromisin
Në një deklaratë të përbashkët, dy deputetët, Johann David Wadephul, zëvendëskryetar i grupit parlamentar CDU/CSU në parlamentin gjerman dhe njëherazi drejtues i grupit të punës së Ballkanit Perëndimor, si dhe Christian Schmidt, CSU, raportuesi për Shqipërinë në Komisionin e Jashtëm dhe ish-ministër federal, shprehin shqetësimin e tyre për krizën e brendshme politike në Shqipëri dhe për zgjedhjet lokale që do të zhvillohen pa opozitën.
Deklarata e Plotë:
“Po e vëzhgojmë me shqetësim të madh krizën e brendshme në Shqipëri. Për të ardhmen evropiane të Shqipërisë nevojitet dialogu mes qeverisë dhe opozitës. Për këtë, të dyja palët duhet të afrohen me njëra-tjetrën dhe të jenë të gatshme për kompromise.
Protestat e përsëritura në Shqipëri janë një shenjë e pakënaqësisë së shumë qytetarëve. Ne bëjmë thirrje që protesta të jetë paqësore. Aktet e dhunës i dënojmë thellësisht. Është përgjegjësia e vendimmarësve të politikës që të sillen të arsyeshëm në këtë situatë dhe që me të gjitha forcat të përpiqen për ta qetësuar gjendjen. Nëse kjo nuk do të ndodhë, ekziston rreziku që vendit t’i mbyllet rruga drejt Evropës.
Ne jemi edhe më tej të gatshëm që të kontribuojmë për hapjen e një dialogu ndërmjet qeverisë dhe opozitës për të kapërcyer krizën. Por kjo mund të funksionojë vetëm nëse të dyja palët hyjnë në bisedime pa vendosur parakushte. Gjithashtu nuk duhet të përjashtohet asnjë temë.
Zgjedhjet pa pjesëmarrjen e opozitës janë problematike në aspektin demokratik. Prandaj duhen vënë në tryezë të gjitha opsionet që u garantojnë qytetareve dhe qytetarëve mundësi të vërteta për të zgjedhur në zgjedhjet lokale. Këtu hyjnë edhe masa të jashtëzakonshme, si për shembull, shtyrja e datës së zgjedhjeve lokale. Qëllimi më i lartë duhet të jetë kthimi pa ekuivok në procedurat demokratike dhe respektimi i standardeve të shtetit të së drejtës në zgjedhje.
Bashkësisë ndërkombëtare nuk i interesojnë konfliktet politike ndërpartiake, por stabiliteti demokratik.”
/javanews/a.rada
