Kjo që shihni në foto është vrima prej nga hajdutët depërtuan brenda ambienteve të degës së BKT në Bllok.
Skandal.al ka mundur të sigurojë një foto të ambjentit nga u grabit banka.
Paratë, siç shihet edhe nga foto, ndodheshin në një dhomë me mure të zakonshme dhe vetëm një derë të blinduar.
Skenari i autorëve të vjedhjes së 200 milionë ka qenë i mirëmenduar në detaje.
Pasi kanë depërtuar në bodrumin e boshatisur prej 3 vitesh, autorët kanë hapur dy të çara në mur me dalje në dhomën kasafortë, ku ndodhet banka.
Hyrja e parë, siç është bërë me dije edhe më parë në bodrumin ngjitur me bankën, është kryer nga dritarja që ndodhet në pjesën e pasme të pallatit në drejtimin nga ish-pallatet “Agimi”.
Pasi kanë hyrë në bodrum për herë të parë, autorët kanë thyer bravën e derës së jashtme të këtij ambienti.
Hyrja kryesore në bodrum dhe dera e hekurt e saj, nga ku kanë lëvizur më pas autorët krejt lirisht, ndodhen në krahun e vilës së ish-diktatorit Enver Hoxha, në zonën e ish-Bllokut.
THYERJA E BRAVËS
Brava e vjetër e derës është gjetur në tokë e thyer dhe e shkatërruar, ndërsa autorët kanë vendosur një bravë të re. Ky veprim mendohet se është kryer të premten në mbrëmje, më 5 gusht.
Të gjitha lëvizjet tjera autorët i kanë kryer nga shkallët dhe porta e përparme e bodrumit, duke mos ngjallur dyshime tek askush, pasi kishin çelësat e bravës që kishin vendosur vetë. Kështu, ata kanë nisur hapjen e vrimave në murin e bodrumit, që ndahej vetëm nga dy shtresa “tek tullë” me dhomën kasafortë ku mbaheshin paratë e bankës.
“Muri ishte i amortizuar dhe tek tullë, shumë i lehtë për t’u hapur nga keqbërësit”, thanë burimet e Prokurorisë. Sipas tyre, edhe ky fakt është një element rëndues për drejtorin e filialit të bankës që është arrestuar, pasi që në momentin kur ka marrë detyrën duhej që të kontrollonte gjithë elementët e sigurisë jo vetëm për dhomën kasafortë, por për të gjithë filialin.
Por, për të realizuar këtë veprim, autorëve të krimit u janë dashur mjete si kriko, tuba metali, bombola gazi e oksigjeni, dalta, çekiç etj., të gjitha të gjetura në vendin e ngjarjes. Këto materiale janë futur aty nga ana e përparme e bodrumit, duke përdorur çelësat e bravës së vendosur nga autorët në derë, pas thyerjes së bravës së parë të saj.
PROVAT
Prokuroria bëri me dije dje se në vendin ku kanë vepruar autorët, brenda bodrumit janë gjetur dy vrima të hapura në mur.
Të dyja vrimat nxirrnin në dhomën kasafortë të filialit të bankës, por, siç del nga kamerat e brendshme të bankës, vetëm njëra është përdorur nga autorët për marrjen e parave.
Në vendin ku janë bërë gërmime në mur janë gjetur shishe plastike uji, ku ka gjurmë gishtash dhe bishta cigaresh, të cilat janë sekuestruar nga hetuesit dhe janë dërguar për ekspertim në Laboratorin e Kriminalistikës.
Lënia e materialeve të tilla brenda në bodrum, sipas hetuesve tregon mungesë vë- mendjeje nga ana e autorëve të krimit, të cilët kanë qenë në perfeksion me gjithë veprimet e tjera që kanë kryer.
Ata kanë arritur të shmangin zhurmat e tepërta që do tërhiqnin vë- mendjen, si dhe nuk kanë rënë në sy të banorëve të zonës dhe as të rojës së parkingut të bankës, nga ku kanë hyrë për herë të parë në bodrumin ngjitur me dhomën kasafortë.
Panorama/d.i.
