Ish-traineri i Anglisë, Fabio Capello, është emëruar trajner i skuadrës së Superligës së Kinës, Jiangsu Suning, ka njoftuar klubi në mediat sociale të dielën.
Capello do të zëvendësojë Choi Yong-soo, që ka dhënë dorëheqje këtë muaj për t’u kthyer si trajner te skuadra FC Seoul në vendlindjen e tij, në Korene e Jugut, pasi Jiangsu u eliminua në 1/8 e finales të Ligës së Kampionëve të Azisë nga ekipi tjetër kinez Shanghai SIPG, shkruan Reuters, transmeton “Koha Ditore”.
Capello merr drejtimin e Jiangsus me synim për të ngritur skuadrën. Jiangsu zë vendin e 15-të në Superligën e Kinës në futboll që numëron 16 skuadra, ndërsa ka fituar vetëm një herë këtë sezon.
“Ne kemi firmosur kontratë me Fabio Capellon. Ai do të jetë kryetrajneri ynë. Mirë se vjen Fabio!” ka shkruar në komunikatë Jiangsu.
Sezoni i tashëm është duke shkuar keq për Jiangsun që edicionin e kaluar përfundoi nënkampion si në Superligën e Kinës ashtu edhe në Kupën e Kinës.
Capello është trajneri i radhës me emër që ka marrë rrugën për në Kinë. Lideri i Superligës së Kinës dhe kampioni në fuqi Guangzhou Evergrande, drejtohet nga trajneri brazilian Luiz Felipe Scolari. Po ashtu, në Kinë drejtojnë skuadra edhe Andre Villas-Boas, Gustavo Poyet e Felix Magath. Ndërsa Marcello Lippi është seleksionues i Kinës…(b.an)
