Ministri i Financave Shkëlqim Cani zhvilloi të shtunën një takim me përfaqësues të subjekteve minerare që zhvillojnë aktivitet në qarkun e Kukësit.
Përfaqësues të subjekteve minerare i kërkuan ministrit Cani rishikimin e çmimit të referencës dhe rentës minerare, pasi sipas tyre ulja e lëndëve minerare në tregjet ndërkombëtare ka ulur fitimin, duke bërë kostot të papërballueshme për ta.
Për të mos shkuar deri në pikën e uljes së fuqisë punëtore ata i kërkuan ministrit Cani që të rishikojë vlerën prej 6% të çmimit të referencës.
Ministri Cani siguroi se të gjitha çështjet e ngritura nga përfaqësuesit e subjekteve minerare janë në axhendën e diskutimeve të qeverisë. Lidhur më rentën minerare, ministri Cani siguroi se shumë shpejt do të reflektohet çmimi i referencës, ndërsa një zgjidhje të shpejtë premtoi edhe sa i takon rimbursimit të TVSH-së..
Kreu i financave mori pjesë edhe në takimin e shtabit të emergjencave civile të Prefekturës Kukës. Ministri Cani theksoi se shtabet e emergjencave dhe firmat kontraktore për pastrimin e rrugëve duhet të jenë ë gatishmëri dhe ti japin zgjidhje problemeve në kohë, pasi sipas tij, edhe fondet qeveritare dhe të pushtetit lokal për emergjenca janë të lëvruar.
