Lorik Cana ka vlerësuar Miroslav Klosen në ditën e largimit të gjermanit nga Lazio dhe shpreh dëshirën për të luajtur sërish në një skuadër me të. Ende nuk dihet se ku do të luajë sulmuesi veteran, por ka zëra se ai do të shkojë në SHBA, te New York Red Bull.
“Unë kam ardhur te Lazio në një kohë me Miron. Kemi qenë me fat që e kemi pasur në ekip. Është privilegj për Lazion që e ka pasur, si dhe për mua që kam luajtur me të, pasi fama e tij është ndërkombëtare”, thotë Cana.
“Një shembull i profesionalizmit, ka shënuar shumë gola dhe profili i tij është i padiskutueshëm. Për një klub si Lazio ishte një lojtar mjaft i mirë dhe jo vetëm në fushë. Me profesionalizmin dhe mentalitetin e tij, gjithashtu ndikonte pozitivisht te shokët e skuadrës”.
“Ai është i jashtëzakonshëm, është një kampion dhe gjithmonë pikë referimi për të fituar. Klose gjithmonë donte të fitonte, edhe në ndeshjen e kontrollit”.
“Kam pasur fatin të njihem me të edhe jashtë fushe. Klose ishte shumë i përpiktë në jetën e tij të përditshme dhe gjithçka e bënte duke menduar mënyrën më të mirë për të ruajtur gjendjen fizike. Ai ka qenë gjithmonë një pikë referimi për të rinjtë. I këshillonte ata, madje edhe për detajet si të ushqeheshin”.
Ashtu si Klose, edhe kapiteni i Shqipërisë do të ndryshojë skuadër, duke u larguar nga Nantes. Teksa flet për Klosen, Cana zbulon ndoshta një sekret: “Do të doja të luaja edhe një vit me Klosen. Kush e di, ndoshta vitin e ardhshëm mund të jemi në një klub së bashku”.
D.I.
