Nganjëherë, fati është i tillë që të plotëson çdo dëshirë dhe të bën të mundur që ëndrrat e shprehura të bëhen realitet. Diçka e tillë ka ndodhur me kapitenin e Shqipërisë.
Lorik Cana ka deklaruar gjithmonë në të shkuarën se ëndërron që të luajë në një Europian me Shqipërinë dhe diçka e tillë u bë realitet. Duke qenë se ky kompeticion zhvillohet në Francë, aty ku është edhe kombëtarja e tij e dytë, kapiteni i kuqezinjve shprehu dëshirën që të luante në “Velodrom”, aty ku ka mbajtur shiritin e Marsejës. Goglat e shortit për fazën e grupeve në Francë 2016 ia kanë bërë të mundur plotë- simin e listës së gjatë të dëshirave mbrojtësit të Kombëtares shqiptare.
“Kjo është një lojë e fatit. Ishte edhe dëshirë e imja që të luaja kundër Francës, por edhe në ‘Velodrom’. Është e kuptueshme që është e veçantë për mua të marr pjesë në një kampionat të rëndësishëm, të parin për Shqipërinë, në vendin tim të dytë dhe për më tepër kundër Francës në Marsejë”, është shprehur fillimisht Cana për “L’Equipe”. Më tej, lideri i kuqezinjve ka vijuar fjalën e tij me specifikën që ka ai stadium edhe për familjen e tij. Loriku ka shpjeguar se impianti i Marsejës ndodhet vetëm pak minuta nga vendi ku banon familja e tij në Francë. “Do të jetë e pabesueshme për familjen time të më shikojë të luaj në stadiumin ‘Velodrom’, vetëm çerek ore larg nga shtëpia ime”, është shprehur kapiteni i Shqipërisë.
Ndërkaq, trajneri i Zvicrës, Vladimir Petkoviç, e njeh mirë Canën, pasi të dy kanë qenë te Lazio. Petkoviç thotë se nga të gjithë lojtarët e Shqipërisë vetëm Cana do të kishte mundësi të hynte në formacionin titullar zviceran.
