Kryeministri i Britanisë së Madhe, David Cameron ka folur për herë të parë në Parlament lidhur me skandalin e Panamasë, pas presioneve të vazhdueshme nga deputetët opozitarë.
Ai ka thënë se prej vitit 2010 nuk ka pasur investime në kompani off-shore, dhe se gjatë orëve të fundit ka publikuar informacione mjaft të qarta në lidhje me të ardhurat e tij.
Cameron ka thënë se që nga zgjedhja e tij kryeministër nuk ka pasur më të ardhura nga kompani të tilla, por ka theksuar se kapitali i është shtuar në mënyra të tjera, të ligjshme, të cilat janë deklaruar edhe në autoritetet përkatëse.
“Kam publikuar të gjitha informacionet e nevojshme në lidhje me fitimet e mia dhe sistemin me të cilin jam taksuar. Këto të dhëna nuk janë vetëm për vitin e shkuar, por për gjashtë vitet që kemi lënë pas. Përveç kësaj, unë kam dhënë edhe informacione të detajuara sa i përket pasurisë së trashëguar, të cilat i kam marrë nga familja. Pra qytetarët mund të shohin lirisht burimet e mia të fitimit, që janë paga ime si kryeministër, mbështetja që kemi marrë unë dhe gruaja ime nga familjet respektive, dhënia me qira e banesës sonë të vjetër si dhe interesi që përfitojmë nga depozitat me interes”, ka thënë Cameron në Parlament.
Por i menjëhershëm ka qenë reagimi i kreut të Partisë Laburiste, Jeremy Corbyn. Ai ka thënë se një numër mjaft i lartë i shtetasve britanikë përdornin kompanitë off-shore për të shmangur detyrimet e tyre taksore.
“I kam shitur kuotat e fondit Blairmore para se të bëhesha kryeministër, sepse doja të shmangia ndonjë konflikt interesi”, ka përsëritur Cameron.
Ai ka qenë zotërues aksionesh, të cilat i shiti para se të hynte në selinë në Downing Street 10, më 2010, duke arritur një fitim për të cilin i ka paguar taksat. Kryeministri ka shtuar edhe se ndihet krenar “për gjithçka që ka bërë babai im. Ishte punëtor i madh dhe baba i jashtëzakonshëm”.
Cameron ka mbrojtur veçanërisht të drejtën e shtetasve të mbretërisë “për të fituar pará, duke respektuar ligjet” dhe si kundërlëvizje ishte njoftimi i masave kundër evazionit dhe për më tepër transparencë, duke u bërë thirrje anëtarëve të qeverisë së tij që të bëjnë të ditura të ardhurat, pikërisht siç bëri ai.
Akuzat kundër të atit, Ian Cameron, vdekur më 2010, i ka konsideruar si “fyese dhe krejtësisht false”. Cameron përsërit se që më 2010 nuk ka asnjë interes në fondin e krijuar nga i ati, Kryeministri saktëson se kompania offshore Blairmore iu ishte nënshtruar taksave vjetore dhe ishte e regjistruar rregullisht si fond investimi komercial dhe jo familjar. Ka shpejguar edhe arsyen pse zgjodhi parajsën fiskale të Panamasë, duke thënë se i duhej të operonte në një zonë në të cilën si valutë përdorej dollari.
