Drejtori i Policisë së Shtetit Drejtues Madhor Haki Çako priti sot në një takim Kryeprokurorin e Leçes, Itali, Cataldo Motta. Në fokus të bisedës së tyre ishte bashkëpunimin mjaft të mirë mes dy agjencive si dhe me autoritetet e drejtësisë italiane.
Drejtori i Policisë Çako theksoi angazhimin dhe përpjekjet e Policisë shqiptare në parandalimin e kultivimit dhe të trafikimit të lëndëve narkotike. “Monitorimi nga ajri i Guardia Di Financa pa limit kohor e në të gjithë territorin e vendit, dhjetra operacione antitrafik të përbashkëta të Policisë së Shtetit me Policinë italiane tregojnë qartë për një bashkëpunim serioz e të besueshëm, duke arritur rezultate shumë të mira në këto drejtime”, u shpreh Çako. Në fjalën e tij Prokurori Motta evidentoi se “falë këtij bashkëpunimi mjaft të suksesshëm jemi sot këtu”.
Ai vlerësoi dhe falënderoi Policinë e Shtetit për angazhimin dhe seriozitetin e treguar në luftën kundër krimit të organizuar dhe kërkoi që ky bashkëpunim të thellohet akoma më tej. Nga ana e tij Drejtori i Policisë së Shtetit Haki Çako e siguroi Kryeprokurorin e Leçes se Policia e Shtetit është tërësisht e angazhuar për ta thelluar më tej këtë bashkëpunim, në drejtim të hetimit dhe vënies para përgjegjësisë ligjore të grupeve kriminale që veprojnë në të dy vendet tona.
ma.me
