Më datë 15 dhjetor 2015 në selinë e Shkollës së Lartë të Policisë në Romë u zhvillua Forumi i Romës ku morën pjesë të gjithë Drejtorët e Policive të Ballkanit.
Forumi i Romës është një nismë e Policisë Italiane me Europolin dhe takimi i parë është zhvilluar në shtator 2013 në Beograd ndërkohë që takimi i dytë është zhvilluar në shtator 2014 në Hagë, pranë selisë së Europolit.
Takimi përbën një tavolinë pune për drejtorët e policive të zonës së Ballkanit me qëllim përforcimin e dialogut mbi temat e Emigracionit të parregullt, terrorizmit, krimeve të natyrës grabitqare (vjedhjet) dhe reinvestimit të kapitaleve me prejardhje të paligjshme.
Në këtë takim morën pjesë Shqipëria, Bosnja dhe Hercegovina, Bullgaria, Kroacia, Greqia, Italia, Maqedonia, Mali i Zi, Rumania, Bullgaria, Serbia, Sllovenia dhe Hungaria.
Drejtori i Europolit Rob Wainwright mori pjesë në cilësinë e bashkëorganizatorit dhe bashkëiniciatorit së bashku me Drejtorin e Policisë Italiane Prefekti Alessandro Pansa. Ministri i Brendshëm Shtz Angelino Alfano përshëndeti këtë Forum të rëndësishëm.
Gjatë ketij forumi u trajtuan tema si, Emigracioni i Parregullt, Terrorizmi, Krimet e natyrës grabitqare dhe Reinvestimet e kapitaleve me prejardhje nga krimi i organizuar.
Drejtori i Policisë Shqiptare Haki ÇAKO, paraqiti situatën në lidhje me këto katër tema duke nxjerrë në pah arritjet e Policisë së Shtetit edhe në sajë të bashkëpunimit të shkëlqyer me partnerët ndërkombëtarë.
Drejtori i Policisë së Shtetit u shpreh se: – E vlerësoj maksimalisht këtë konferencë për vetë faktin se për objekt diskutimi ka katër tematika që tashmë kanë zënë prioritetet tona në luftën kundër krimit. Migracioni i paligjshëm, Terrorizmi, Pastrimi i Parave dhe i Produkteve të Parave të pista dhe Krimet e natyrës grabitqare.
I pari si fenomen shqetësues dhe përveç faktit që shpesh herë është eksportues i fenomeneve kriminale, e i dyti si një fenomen që çdo ditë e më shumë përpiqet të minojë vlerat më të mira të demokracisë në vendet tona dhe dy të tjerët si fenomene kriminale që organizatat tona janë në përballje të përhershme.
Në përfundim të fjalës së tij, Z. Çako i ftoi kolegët që të forcojmë bashkëpunimin ndërmjet policive të rajonit me qëllim që kufijtë t’i kthejnë në barriera të pakalueshme për aktivitetet kriminale dhe nga ana tjetër t’i kthejmë ato në vija të padukshme për lëvizjen e qytetareve tanë.
Drejtori i Policisë së Shtetit, Drejtues Madhor Haki Çako, në këtë forum ishte i shoqëruar nga Koordinatori Kombëtar i Policisë së Shtetit me Policinë Italiane zoti Artur Beu.
Gjatë ditës së sotme, ÇAKO do zhvillojë disa takime me homologët e tij .
