Drejtori i Policisë së Shtetit, Haki Çako informoi këtë të mërkurë përfaqësuesit e misioneve ndërkombëtare që asistojnë policinë shqiptare, mbi veprimtarinë e uniformave blu për tremujorin e parë të vitit 2017.
Gjatë fjalës së tij, Çako ka theksuar se prioritet për vitin 2017 mbetet intesifikimi i luftës së përbashkët ndaj çdo veprimtarie të paligjshme në vend, sidomos parandalimi i kultivimit dhe trafikimit të lëndëve narkotike.
“Jemi në një fazë shumë të rëndësishme të rritjes së intesitetit për luftën kundër kultivimit në mënyrë të veçantë por edhe të trafikimit. Është shumë e rëndësishme të kuptojmë se këtë vit plani i veprimit, ose synimi që ka qeveria shqiptare është minizimi në maksimum i fenomenit të kultivimit, duke angazhuar dhe duke vënë në lëvizje të plotë të gjitha institucionet në vend”, ka deklaruar Çako.
I pranishëm në këtë takim, drejtori i përgjithshëm për Sigurinë Publike, Altin Qato ka bërë prezente masat e marra nga Policia e Shtetit për zbatimin e planit kombëtar të veprimit kundër narkoitkëve dhe goditjen e grupeve kriminale që menaxhojnë trafiqet.
Nga ana e tyre, përfaqësuesit e misioneve të huaja kanë theksuar se standardi i komunikimit dhe shkëmbimit të informacionit i vendosur vitin e kaluar është shumë i rëndësishëm dhe i shërben rritjes së bashkëpunimit mes policisë shqiptare dhe policive partnere.
c.a
