Janë rritur së tepërmi numrat e personave, pra kandidatët e listave pritëse të opozitës, të cilët pritet të marrin mandatet e deputetëve. Me një vëzhgim të thjeshtë që ka bërë CNA.al, duke kaluar në çdo qark, rezulton se nga PD dhe LSI, priten që të paktën rreth 20 deri në 25 kandidatë të marrin mandatet e deputetëve.
Në çdo qark të Shqipërisë ka njerëz nga PD dhe LSI që pranojnë mandatet. Por, ajo që po ndodh është se KQZ-ja pritet që shumë prej emrave të cilët pranojnë për të qënë deputet, ti shpallë në hapat e mëvonshëm.
Pasi konsumohet pjesa e parë e listës, do të vijë edhe pjesa finale, ku nga kontaktet e bëra nga CNA.al rezulton se do të ketë minimalisht 20 deputetë të rinj në parlament.
Aktualisht mandatet i kanë marrë rreth 5 përfaqësues të LSI-së, ndërsa nga PD-ja deputetët që nuk i kanë dorëzuar mandatet janë Rudina Hajdari, Myslim Murrizi, dhe pritet që sot të marrë mandatin e deputetit nga radhët e PD-së edhe Lefter Maliqi.
PD do të ketë në fund të prillit afërsisht 10 deputetë në parlament, çka e bën këtë parti një grup parlamentar. Edhe LSI në fakt është me po aq deputetë, dhe pritet që të ketë edhe ajo grupin e ri parlamentar. Pra, do të kemi një opozitë të re parlamentare, e cila do të dalë nga listat pritëse të kandidatëve të Lulzim Bashës të vitit 2017.
/a.meta
