Partia Demokratike duket se po përdor një standard të dyfishtë sa i përket formës së protestës dhe kërkesave të opozitës.
Në vitin 2010, ndërsa PS ndodhej në protestë në lidhje me zgjedhjet e vitit 2009, Sali Berisha atëherë kryeministër ka mbajtur një qëndrim përtej indiferentes.
Ish-kryeministri në atë kohë deklaronte se çfarëdolloj hapi që të merrte Edi Rama, ai nuk do të merrej në konsideratë nga qeveria. Siç deklaronte Berisha, e vetmja zgjidhje për kërkesat ndaj procesit zgjedhor ishin ndryshimet e mundshme në Kod Zgjedhor nëse opozita e atëhershme kishte vërejtje.
Sot, PD nuk ka ndërmarrë asnjë hap për ndryshime në Kod, që do të mund t’i bënin zgjedhjet më të sigurta. Përkundra, opozita ka braktisur të gjitha komisionet parlamentare, përfshirë edhe atë të Reformës Zgjedhore.
“Zgjedhjet do të bëhen, garantoj shqiptarët se do të jenë të lira dhe të ndershme. Zoti Rama le të shtrihet përdhe, të bëjë ç’të dojë, unë zgjedhjet do t’i bëj. Ju bëni si të doni, bojkot ose jo. Unë ju ftoj të merrni pjesë. nëse ju doni të merrni pjesë, jeni të mirëseardhur, doni të bojkotoni… bojkotoni. Keni vërejtje për Kodin Zgjedhor, sillni amendamentet. Në të kundërt vazhdoni programin sipas kërkesave të kryetarit tuaj” – thoshte Sali Berisha në vitin 2010. /javanews/b.d
