Takimi mes aleatëve të qeverisë ka përfunduar, ndërsa interesimit të medias i është përgjigjur Ministri i Ekonomisë Arben Ahmetaj, i cili në lidhje me reformën në drejtësi dhe Byronë Kombëtare të Hetimit tha se do të pritet ardhja e opinionit përfundimtar të Komisionit të Venecias.
“U diskutua në parim për reformën dhe do të pritet për opinionin e Komisionit të Venecias.”- tha Ahmetaj.
Sakaq, pas takimit që zgjati rreth dy orë, Kryeministri dhe Kreu i parlamentit nuk kanë folur për median duke u larguar nga Vila shtetërore.
Një ditë më parë PD ka kërkuar miratimin e Byrosë Kombëtare të Hetimit sipas formatit të propozuar nga ekspertët e SHBA-së, ndërsa Ilir Meta i ka propozuar opozitës që ajo të sjellë një draft të sajin në lidhje me këtë çështje. Nga ana e tij Kryeministri Rama tha se Byroja është pjesë e drafit të reformës në drejtësi dhe si e tillë do të votohet së bashku me të kur të vijë edhe opinioni final i Komisionit të Venecias në 12 mars.
